ਲੁਈਸਿਆਨਾ ਦੇ ਬੈਟਨ ਰੂਜ ਦੇ ਇਕ ਨਾਈਟ ਕਲੱਬ ‘ਚ ਐਤਵਾਰ ਦੇਰ ਰਾਤ ਹੋਈ ਫਾਇਰਿੰਗ ‘ਚ 12 ਲੋਕ ਜ਼ਖ਼ਮੀ ਹੋ ਗਏ। ਪੁਲੀਸ ਨੇ ਦੱਸਿਆ ਕਿ ਜ਼ਖ਼ਮੀਆਂ ‘ਚੋਂ ਇਕ ਦੀ ਹਾਲਤ ਗੰਭੀਰ ਹੈ ਜਦਕਿ ਬਾਕੀਆਂ ਦੀ ਹਾਲਤ ਸਥਿਰ ਹੈ। ਫਾਇਰਿੰਗ ਦੇ ਸਬੰਧ ‘ਚ ਅਜੇ ਤੱਕ ਕੋਈ ਗ੍ਰਿਫ਼ਤਾਰੀ ਨਹੀਂ ਹੋਈ ਹੈ। ਪੁਲੀਸ ਦੇ ਬੁਲਾਰੇ ਸਾਰਜੈਂਟ ਅਲ ਜੀਨ ਮੈਕਨੀਲੀ ਜੂਨੀਅਰ ਨੇ ਦੱਸਿਆ ਕਿ ਗੋਲੀਬਾਰੀ ਦੀ ਇਹ ਘਟਨਾ ਦੇਰ ਰਾਤ ਕਰੀਬ ਡੇਢ ਵਜੇ ਡਿਓਰ ਬਾਰ ਐਂਡ ਲੌਂਜ ‘ਚ ਵਾਪਰੀ। ਅਜੇ ਗੋਲੀਬਾਰੀ ਦੇ ਕਾਰਨਾਂ, ਪੀੜਤਾਂ ਜਾਂ ਜਾਂਚ ਬਾਰੇ ਫਿਲਹਾਲ ਕੋਈ ਵਾਧੂ ਜਾਣਕਾਰੀ ਉਪਲੱਬਧ ਨਹੀਂ ਹੈ। ਬੈਟਨ ਰੂਜ ਦੇ ਮੇਅਰ ਸ਼ੈਰਨ ਵੈਸਟਨ ਬਰੂਮ ਨੇ ਗੋਲੀਬਾਰੀ ਨੂੰ ‘ਹਿੰਸਾ ਦੀ ਨਿੰਦਣਯੋਗ ਕਾਰਵਾਈ ਕਰਾਰ ਦਿੱਤਾ, ਜਿਸ ਦੇ ਦੋਸ਼ੀਆਂ ਨੂੰ ਬਖ਼ਸ਼ਿਆ ਨਹੀਂ ਜਾਵੇਗ।’ ਬਰੂਮ ਨੇ ਟਵੀਟ ਕੀਤਾ, ‘ਅਸੀਂ ਆਪਣਾ ਕੰਮ ਉਦੋਂ ਤੱਕ ਨਹੀਂ ਰੋਕਾਂਗੇ, ਜਦੋਂ ਤੱਕ ਹਰ ਕੋਈ ਸੁਰੱਖਿਅਤ ਮਹਿਸੂਸ ਨਹੀਂ ਕਰਦਾ ਅਤੇ ਲੋਕ ਆਪਣੇ ਮਤਭੇਦਾਂ ਨੂੰ ਦੂਰ ਕਰਨ ਲਈ ਬੰਦੂਕ ਚੁੱਕਣਾ ਨਹੀਂ ਛੱਡ ਦਿੰਦੇ।’
