ਚਿਲੀ ਦੇ ਜੰਗਲਾਂ ‘ਚ ਲੱਗੀ ਅੱਗ ਕਾਰਨ ਘੱਟੋ-ਘੱਟ 13 ਲੋਕਾਂ ਦੀ ਮੌਤ ਹੋ ਗਈ ਹੈ। ਗਰਮੀ ਕਾਰਨ ਚਿੱਲੀ ‘ਚ 150 ਤੋਂ ਵੱਧ ਜੰਗਲਾਂ ‘ਚ ਅੱਗ ਲੱਗ ਚੁੱਕੀ ਹੈ। ਇਸ ਘਟਨਾ ‘ਚ ਕਈ ਘਰ ਸੜ ਕੇ ਸੁਆਹ ਹੋ ਗਏ ਹਨ, ਜਦਕਿ ਹਜ਼ਾਰਾਂ ਏਕੜ ‘ਚ ਫੈਲੇ ਜੰਗਲਾਂ ਨੂੰ ਨੁਕਸਾਨ ਪਹੁੰਚਿਆ ਹੈ। ਅਜਿਹਾ ਲੱਗਦਾ ਹੈ ਕਿ ਦੱਖਣੀ ਅਮਰੀਕੀ ਦੇਸ਼ ਅੱਗ ਦੀ ਲਪੇਟ ‘ਚ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਜੰਗਲ ਵਿਚ ਲੱਗੀ ਅੱਗ ਕਾਰਨ ਬਾਇਓਬੋ ਖੇਤਰ ਵਿੱਚੋਂ ਲੰਘ ਰਹੇ ਚਾਰ ਲੋਕਾਂ ਦੀ ਮੌਤ ਹੋ ਗਈ, ਜੋ 2 ਵੱਖ-ਵੱਖ ਵਾਹਨਾਂ ‘ਚ ਸਫ਼ਰ ਕਰ ਰਹੇ ਸਨ। ਬਾਇਓਬੋ ਰਾਜਧਾਨੀ ਸੈਂਟੀਆਗੋ ਤੋਂ ਲਗਭਗ 560 ਕਿਲੋਮੀਟਰ ਦੱਖਣ ਵਿੱਚ ਸਥਿਤ ਹੈ। ਚਿਲੀ ਦੀ ਗ੍ਰਹਿ ਮੰਤਰੀ ਕੈਰੋਲੀਨਾ ਟੋਹ ਨੇ ਕਿਹਾ, ‘ਇਕ ਮਾਮਲੇ ‘ਚ ਲੋਕ ਇਸ ਲਈ ਮਾਰੇ ਗਏ ਕਿਉਂਕਿ ਉਹ ਅੱਗ ‘ਚ ਫਸ ਗਏ ਸਨ। ਹੋਰ ਮਾਮਲਿਆਂ ‘ਚ ਪੀੜਤਾਂ ਦੀ ਸੜਕ ਹਾਦਸੇ ਕਾਰਨ ਮੌਤ ਹੋ ਗਈ। ਉਹ ਸ਼ਾਇਦ ਅੱਗ ਤੋਂ ਬਚਣ ਦੀ ਕੋਸ਼ਿਸ਼ ਕਰ ਰਹੇ ਸਨ।’ ਪੰਜਵਾਂ ਪੀੜਤ ਇਕ ਫਾਇਰ ਫਾਈਟਰ ਸੀ, ਜੋ ਅੱਗ ਤੋਂ ਬਚਾਓ ਕਾਰਜਾਂ ਦੌਰਾਨ ਇਕ ਫਾਇਰਬ੍ਰਿਗੇਡ ਵਾਹਨ ਦੀ ਲਪੇਟ ‘ਚ ਆ ਕੇ ਮਾਰਿਆ ਗਿਆ। ਉਥੇ ਹੀ ਬਾਅਦ ਦੁਪਹਿਰ ਅੱਗ ਬਚਾਓ ਕਾਰਜਾਂ ‘ਚ ਸ਼ਾਮਲ ਇਕ ਹੈਲੀਕਾਪਟਰ ਅਰਾਉਕਾਨਾ ਖੇਤਰ ‘ਚ ਕਰੈਸ਼ ਹੋ ਗਿਆ ਜਿਸ ‘ਚ ਪਾਇਲਟ, ਇਕ ਬੋਲੀਵੀਆਈ ਨਾਗਰਿਕ ਅਤੇ ਇੱਕ ਮਕੈਨਿਕ ਦੀ ਮੌਤ ਹੋ ਗਈ, ਜੋ ਚਿਲੀ ਦਾ ਨਾਗਰਿਕ ਸੀ। ਰਾਸ਼ਟਰੀ ਐਮਰਜੈਂਸੀ ਏਜੰਸੀ ਨੇ ਕਿਹਾ ਕਿ ਮਰਨ ਵਾਲਿਆਂ ਦੀ ਗਿਣਤੀ 13 ਹੋ ਗਈ ਹੈ। ਹਾਲਾਂਕਿ, ਏਜੰਸੀ ਨੇ ਤਾਜ਼ਾ ਮੌਤਾਂ ਦੇ ਵੇਰਵੇ ਸਾਂਝੇ ਨਹੀਂ ਕੀਤੇ।
