ਇਕ ਭਾਰਤੀ ਨਾਗਰਿਕ ਨੂੰ ਲੰਡਨ ‘ਚ ਸਕਾਟਲੈਂਡ ਯਾਰਡ ਪੁਲੀਸ ਨੇ ਅਮਰੀਕਨ ਹਵਾਲਗੀ ਵਾਰੰਟ ‘ਤੇ ਗ੍ਰਿਫ਼ਤਾਰ ਕੀਤਾ ਹੈ, ਜਿਸ ‘ਤੇ ਅੱਤਵਾਦੀ ਜਥੇਬੰਦੀ ਨੂੰ ਫੰਡ ਦੇਣ ਦਾ ਸ਼ੱਕ ਹੈ। ਇਹ 66 ਸਾਲਾ ਭਾਰਤੀ ਨਾਗਰਿਕ ਸੁੰਦਰ ਨਾਗਾਰਾਜਨ ਆਪਣਾ ਪਤਾ ਬ੍ਰਿਟੇਨ ਅਤੇ ਬੈਲਜੀਅਮ ਦਾ ਦੱਸਦਾ ਹੈ। ਪੁਲੀਸ ਨੇ ਉਸ ਨੂੰ ਲੰਡਨ ‘ਚ ਪਾਬੰਦੀਸ਼ੁਦਾ ਅੱਤਵਾਦੀ ਸੰਗਠਨ ਹਿਜ਼ਬੁੱਲਾ ਨੂੰ ਫੰਡ ਦੇਣ ਦੇ ਸ਼ੱਕ ‘ਚ ਗ੍ਰਿਫ਼ਤਾਰ ਕੀਤਾ ਹੈ। ਇਹ ਕਦਮ ਅੱਤਵਾਦ ਦੇ ਵਿੱਤ ਪੋਸ਼ਣ ਖ਼ਿਲਾਫ਼ ਬ੍ਰਿਟੇਨ-ਅਮਰੀਕਾ ਦੀ ਤਾਲਮੇਲ ਕਾਰਵਾਈ ਦੇ ਹਿੱਸੇ ਵਜੋਂ ਚੁੱਕਿਆ ਗਿਆ। ਸੁੰਦਰ ਨਾਗਾਰਾਜਨ ਉਰਫ ਨਾਗਾਰਾਜਨ ਸੁੰਦਰ ਪੂੰਗੁਲਮ ਕੇ. ਨਾਗਾ ਨੂੰ ਪੁਲੀਸ ਦੀ ਰਾਸ਼ਟਰੀ ਹਵਾਲਗੀ ਯੂਨਿਟ ਨੇ ਪੱਛਮੀ ਲੰਡਨ ਦੇ ਹੇਜ਼ ਇਲਾਕੇ ਤੋਂ ਗ੍ਰਿਫ਼ਤਾਰ ਕੀਤਾ ਸੀ। ਜ਼ਮਾਨਤ ਦੇਣ ਤੋਂ ਇਨਕਾਰ ਕੀਤੇ ਜਾਣ ਤੋਂ ਬਾਅਦ ਧੋਖਾਧੜੀ ਅਤੇ ਮਨੀ ਲਾਂਡਰਿੰਗ ਦੇ ਅਪਰਾਧਾਂ ਲਈ ਅਮਰੀਕਨ ਅਧਿਕਾਰੀਆਂ ਦੁਆਰਾ ਲੋੜੀਂਦੇ ਨਾਗਾਰਾਜਨ ਨੂੰ ਅਗਲੇ ਹਫ਼ਤੇ ਲੰਡਨ ਦੀ ਵੈਸਟਮਿੰਸਟਰ ਮੈਜਿਸਟਰੇਟ ਅਦਾਲਤ ‘ਚ ਪੇਸ਼ ਕੀਤਾ ਜਾਵੇਗਾ। ਮਦੁਰਾਈ ‘ਚ ਜਨਮੇ ਨਾਗਾਰਾਜਨ ਨੂੰ ਇਕ 50 ਸਾਲਾ ਵਿਅਕਤੀ ਦੀ ਵੇਲਜ਼ ‘ਚ ਗ੍ਰਿਫ਼ਤਾਰੀ ਕੀਤੇ ਜਾਣ ਤੋਂ ਬਾਅਦ ਫੜਿਆ ਗਿਆ, ਜਿਸ ‘ਤੇ ਅੱਤਵਾਦੀ ਫੰਡਿੰਗ ‘ਚ ਸ਼ਾਮਲ ਹੋਣ ਦਾ ਸ਼ੱਕ ਹੈ। ਪੁਲੀਸ ਨੇ ਕਿਹਾ ਕਿ ਨਾਗਾਰਾਜਨ ਦੇ ਹੀਰਾ ਵਪਾਰੀ ਨਜੀਮ ਅਹਿਮਦ ਨਾਲ ਸਬੰਧ ਹੋਣ ਦਾ ਸ਼ੱਕ ਹੈ। ਅਹਿਮਦ ਨੂੰ ਮਨੀ ਲਾਂਡਰਿੰਗ ਅਤੇ ਅੱਤਵਾਦੀ ਫੰਡਿੰਗ ‘ਚ ਸ਼ਾਮਲ ਮੰਨਿਆ ਜਾਂਦਾ ਹੈ।
