ਵਿਸ਼ਵ ਦਾ ਨੰਬਰ ਇਕ ਖਿਡਾਰੀ ਸਰਬੀਆ ਦਾ ਨੋਵਾਕ ਜੋਕੋਵਿਚ ਸਪਰਸਕਾ ਓਪਨ ਟੈਨਿਸ ਟੂਰਨਾਮੈਂਟ ਦੇ ਕੁਆਰਟਰ ਫਾਈਨਲ ‘ਚ ਆਪਣੇ ਹਮਵਤਨ ਡੁਸਾਨ ਲਾਜੋਵਿਚ ਹੱਥੋਂ ਹਾਰ ਗਿਆ। ਇਹ ਪਿਛਲੇ 11 ਸਾਲਾਂ ‘ਚ ਪਹਿਲਾ ਮੌਕਾ ਹੈ ਜਦਕਿ ਜੋਕੋਵਿਚ ਨੂੰ ਆਪਣੇ ਹਮਵਤਨ ਕਿਸੇ ਖਿਡਾਰੀ ਹੱਥੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਲਾਜੋਵਿਚ ਨੇ ਇਸ ਮੈਚ ‘ਚ 6-4, 7-6 (6) ਨਾਲ ਜਿੱਤ ਦਰਜ ਕਰਨ ਤੋਂ ਬਾਅਦ ਕਿਹਾ, ‘ਇਹ ਮੇਰੇ ਕਰੀਅਰ ਦੀ ਸਭ ਤੋਂ ਵੱਡੀ ਜਿੱਤ ਹੈ। ਜੋਕੋਵਿਚ ਮੇਰਾ ਚੰਗਾ ਦੋਸਤ ਤੇ ਸਾਡੇ ਦੇਸ਼ ਦਾ ਨਾਇਕ ਹੈ। ਮੈਂ ਉਸ ਨੂੰ ਹਰਾਉਣ ਦੇ ਬਾਰੇ ‘ਚ ਸੋਚਿਆ ਤਕ ਨਹੀਂ ਸੀ ਪਰ ਅਜਿਹਾ ਹੋ ਗਿਆ।’ ਜੋਕੋਵਿਚ ਨੂੰ ਇਸ ਤੋਂ ਪਹਿਲਾਂ ਆਖਰੀ ਵਾਰ ਸਰਬੀਆ ਦੇ ਕਿਸੇ ਖਿਡਾਰੀ ਹੱਥੋਂ 2012 ‘ਚ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਤਦ ਮੈਡ੍ਰਿਡ ‘ਚ ਜਾਂਕੋ ਟਿਪਸਾਰੇਵਿਚ ਨੇ ਉਸ ਨੂੰ ਹਰਾਇਆ ਸੀ।
