ਸਚਿਨ ਤੇਂਦੁਲਕਰ ਤੇ ਬ੍ਰਾਇਨ ਲਾਰਾ ਦੇ ਨਾਂ ‘ਤੇ ਕ੍ਰਿਕਟ ਗਰਾਊਂਡ ਦੇ ਗੇਟ ਦਾ ਨਾਮ

ਆਸਟਰੇਲੀਆ ਦੇ ਸਿਡਨੀ ਕ੍ਰਿਕਟ ਗਰਾਊਂਡ ਵਿਖੇ ਇਕ ਗੇਟ ਦਾ ਨਾਮ ਮਹਾਨ ਭਾਰਤੀ ਬੱਲੇਬਾਜ਼ ਸਚਿਨ ਤੇਂਦੁਲਕਰ ਦੇ ਨਾਂ ‘ਤੇ ਰੱਖਿਆ ਗਿਆ ਹੈ। ਇਸ ਦਾ ਉਦਘਾਟਨ ਸਚਿਨ ਤੇਂਦੁਲਕਰ ਦੇ 50ਵੇਂ ਜਨਮ ਦਿਨ ਮੌਕੇ ਕੀਤਾ ਗਿਆ। ਤੇਂਦੁਲਕਰ ਸੋਮਵਾਰ ਨੂੰ 50 ਸਾਲ ਦੇ ਹੋ ਗਏ। ਉਨ੍ਹਾਂ ਨੇ ਐੱਸ.ਸੀ.ਜੀ. (ਸਿਡਨੀ ਕ੍ਰਿਕਟ ਗਰਾਊਂਡ) ‘ਤੇ 5 ਟੈਸਟਾਂ ‘ਚ 157 ਦੀ ਔਸਤ ਨਾਲ 785 ਦੌੜਾਂ ਬਣਾਈਆਂ ਜਿਸ ‘ਚ ਉਨ੍ਹਾਂ ਦਾ ਸਭ ਤੋਂ ਵੱਧ ਸਕੋਰ ਨਾਬਾਦ 241 ਰਿਹਾ। ਤੇਂਦੁਲਕਰ ਨੇ ਐੱਸ.ਸੀ.ਜੀ. ਨੂੰ ਇੰਡੀਆ ਤੋਂ ਬਾਹਰ ਆਪਣਾ ਪਸੰਦੀਦਾ ਕ੍ਰਿਕਟ ਮੈਦਾਨ ਦੱਸਿਆ। ਤੇਂਦੁਲਕਰ ਨੇ ਐੱਸ.ਸੀ.ਜੀ. ਵੱਲੋਂ ਜਾਰੀ ਬਿਆਨ ‘ਚ ਕਿਹਾ, ‘ਸਿਡਨੀ ਕ੍ਰਿਕਟ ਗਰਾਊਂਡ ਇੰਡੀਆ ਤੋਂ ਬਾਹਰ ਮੇਰਾ ਪਸੰਦੀਦਾ ਮੈਦਾਨ ਰਿਹਾ ਹੈ। ਆਸਟਰੇਲੀਆ ਦੇ 1991-92 ‘ਚ ਮੇਰੇ ਪਹਿਲੇ ਦੌਰੇ ਤੋਂ ਐੱਸ.ਸੀ.ਜੀ. ਨਾਲ ਜੁੜੀਆਂ ਮੇਰੀਆਂ ਕੁਝ ਖਾਸ ਯਾਦਾਂ ਹਨ।’ ਐੱਸ.ਸੀ.ਜੀ. ਵਿਖੇ ਬ੍ਰਾਇਨ ਲਾਰਾ ਦੇ 277 ਦੌੜਾਂ ਦੇ 30 ਸਾਲ ਪੂਰੇ ਹੋਣ ‘ਤੇ ਵੈਸਟਇੰਡੀਜ਼ ਦੇ ਇਸ ਮਹਾਨ ਬੱਲੇਬਾਜ਼ ਦੇ ਨਾਮ ‘ਤੇ ਵੀ ਇਕ ਗੇਟ ਦਾ ਉਦਘਾਟਨ ਕੀਤਾ ਗਿਆ। ਇਨ੍ਹਾਂ ਦੋ ਗੇਟਾਂ ਦਾ ਉਦਘਾਟਨ ਐੱਸ.ਸੀ.ਜੀ. ਦੇ ਚੇਅਰਮੈਨ ਰੋਡ ਮੈਕਗਿਓਚ ਅਤੇ ਸੀ.ਈ.ਓ. ਕੇਰੀ ਮਾਥੇਰ ਅਤੇ ਕ੍ਰਿਕਟ ਆਸਟਰੇਲੀਆ ਦੇ ਸੀ.ਈ.ਓ. ਨਿਕ ਹਾਕਲੇ ਨੇ ਕੀਤਾ। ਖਿਡਾਰੀ ਹੁਣ ਲਾਰਾ-ਤੇਂਦੁਲਕਰ ਗੇਟ ਰਾਹੀਂ ਮੈਦਾਨ ਵਿੱਚ ਦਾਖ਼ਲ ਹੋਣਗੇ। ਇਨ੍ਹਾਂ ਦੋਵਾਂ ਗੇਟਾਂ ‘ਤੇ ਇਕ ਤਖ਼ਤੀ ਵੀ ਲਗਾਈ ਗਈ ਹੈ ਜਿਸ ‘ਚ ਇਨ੍ਹਾਂ ਦੋਵਾਂ ਖਿਡਾਰੀਆਂ ਦੀਆਂ ਪ੍ਰਾਪਤੀਆਂ ਅਤੇ ਐੱਸ.ਸੀ.ਜੀ. ‘ਚ ਉਨ੍ਹਾਂ ਦੇ ਰਿਕਾਰਡ ਦਾ ਵਰਣਨ ਕੀਤਾ ਗਿਆ ਹੈ। ਤੇਂਦੁਲਕਰ ਨੇ ਕਿਹਾ, ‘ਇਹ ਬਹੁਤ ਸਨਮਾਨ ਦੀ ਗੱਲ ਹੈ ਕਿ ਖਿਡਾਰੀ ਐੱਸ.ਸੀ.ਜੀ. ‘ਚ ਦਾਖਲ ਹੋਣ ਲਈ ਉਸ ਗੇਟ ਦੀ ਵਰਤੋਂ ਕਰਨਗੇ ਜਿਨ੍ਹਾਂ ਦਾ ਨਾਮ ਮੇਰੇ ਅਤੇ ਮੇਰੇ ਚੰਗੇ ਦੋਸਤ ਬ੍ਰਾਇਨ ਦੇ ਨਾਮ ‘ਤੇ ਰੱਖਿਆ ਗਿਆ ਹੈ। ਮੈਂ ਇਸਦੇ ਲਈ ਐੱਸ.ਸੀ.ਜੀ. ਅਤੇ ਕ੍ਰਿਕਟ ਆਸਟਰੇਲੀਆ ਦਾ ਧੰਨਵਾਦ ਕਰਦਾ ਹਾਂ। ਜਲਦੀ ਹੀ ਐੱਸ.ਸੀ.ਜੀ. ਦਾ ਦੌਰਾ ਕਰਾਂਗਾ। ਲਾਰਾ ਨੇ ਕਿਹਾ, ‘ਮੈਂ ਸਿਡਨੀ ਕ੍ਰਿਕਟ ਗਰਾਊਂਡ ਤੋਂ ਮਿਲੀ ਇਸ ਮਾਨਤਾ ਨਾਲ ਬਹੁਤ ਸਨਮਾਨਿਤ ਮਹਿਸੂਸ ਕਰ ਰਿਹਾ ਹਾਂ ਅਤੇ ਮੈਨੂੰ ਯਕੀਨ ਹੈ ਕਿ ਸਚਿਨ ਵੀ ਅਜਿਹਾ ਮਹਿਸੂਸ ਕਰ ਰਹੇ ਹੋਣਗੇ। ਇਸ ਮੈਦਾਨ ਨਾਲ ਮੇਰੀਆਂ ਅਤੇ ਮੇਰੇ ਪਰਿਵਾਰ ਦੀਆਂ ਖਾਸ ਯਾਦਾਂ ਜੁੜੀਆਂ ਹੋਈਆਂ ਹਨ ਅਤੇ ਜਦੋਂ ਵੀ ਮੈਂ ਆਸਟਰੇਲੀਆ ‘ਚ ਹੁੰਦਾ ਹਾਂ ਤਾਂ ਮੈਨੂੰ ਇਥੇ ਦਾ ਦੌਰਾ ਕਰਨ ‘ਚ ਬਹੁਤ ਮਜ਼ਾ ਆਉਂਦਾ ਹੈ।’ ਤੇਂਦੁਲਕਰ ਅਤੇ ਲਾਰਾ ਹੁਣ ਡੋਨਾਲਡ ਬ੍ਰੈਡਮੈਨ, ਐਲਨ ਡੇਵਿਡਸਨ ਅਤੇ ਆਰਥਰ ਮੌਰਿਸ ਦੇ ਕਲੱਬ ‘ਚ ਸ਼ਾਮਲ ਹੋ ਗਏ ਹਨ ਜਿਨ੍ਹਾਂ ਦੇ ਨਾਮ ‘ਤੇ ਐੱਸ.ਸੀ.ਜੀ. ‘ਚ ਗੇਟ ਹਨ।