ਕੁਸ਼ਤੀ ਫੈਡਰੇਸ਼ਨ ਦੇ ਪ੍ਰਧਾਨ ਅਤੇ ਭਾਜਪਾ ਆਗੂ ਬ੍ਰਿਜ ਭੂਸ਼ਣ ਸ਼ਰਨ ਸਿੰਘ ਖ਼ਿਲਾਫ਼ ਦਿੱਲੀ ਦੇ ਜੰਤਰ ਮੰਤਰ ‘ਤੇ ਧਰਨਾ ਦੇ ਰਹੇ ਪਹਿਲਵਾਨਾਂ ਨੇ ਮੀਡੀਆ ਦੀ ‘ਪੱਖਪਾਤੀ’ ਭੂਮਿਕਾ ‘ਤੇ ਵੀ ਸਵਾਲ ਚੁੱਕੇ ਹਨ। ਇਨ੍ਹਾਂ ਪਹਿਲਵਾਨਾਂ ਦਾ ਦੋਸ਼ ਹੈ ਕਿ ਮੁੱਖ ਧਾਰਾ ਦਾ ਮੀਡੀਆ ਖਿਡਾਰੀਆਂ ਦੀ ਸਹਾਇਤਾ ਕਰਨ ਦੀ ਥਾਂ ਮੁਲਜ਼ਮ ਦੀ ਮੱਦਦ ਕਰ ਰਿਹਾ ਹੈ। ਪਹਿਲਵਾਨ ਬਜਰੰਗ ਪੂਨੀਆ ਨੇ ਕਿਹਾ, ‘ਮੀਡੀਆ ਖਿਡਾਰੀਆਂ ਤੋਂ ਜ਼ਿਆਦਾ ਬ੍ਰਿਜ ਭੂਸ਼ਣ ਦੀ ਹਮਾਇਤ ਕਰ ਰਿਹਾ ਹੈ। ਤੁਸੀਂ ਉਸ ਦਾ ਅਪਰਾਧਿਕ ਰਿਕਾਰਡ ਦੇਖੋ। ਕੀ ਇਥੇ ਬੈਠੇ ਜਾਂ ਹੋਰ ਖੇਡਾਂ ਦੇ ਖਿਡਾਰੀਆਂ ਦਾ ਕੋਈ ਅਪਰਾਧਿਕ ਰਿਕਾਰਡ ਹੈ?’ ਬਜਰੰਗ ਨੇ ਇਹ ਸੁਨੇਹਾ ਦੇਣ ਦੀ ਕੋਸ਼ਿਸ਼ ਕੀਤੀ ਕਿ ਦੇਸ਼ ‘ਚ ਸੰਸਦ ਮੈਂਬਰ ਬਣਨ ਨਾਲੋਂ ਬਹੁਤਾ ਮੁਸ਼ਕਲ ਓਲੰਪਿਕ ‘ਚ ਤਗ਼ਮਾ ਜਿੱਤਣਾ ਹੁੰਦਾ ਹੈ। ਉਨ੍ਹਾਂ ਕਿਹਾ, ‘ਖਿਡਾਰੀ ਦੇਸ਼ ਲਈ ਤਗ਼ਮੇ ਜਿੱਤਦੇ ਹਨ ਅਤੇ ਉਹ ਤਗ਼ਮਾ ਜੇਤੂਆਂ ਨੂੰ ਸਵਾਲ ਕਰ ਰਿਹਾ ਹੈ। ਦੇਸ਼ ‘ਚ ਕਿੰਨੇ ਲੋਕ ਸੰਸਦ ਮੈਂਬਰ ਬਣਦੇ ਹਨ ਅਤੇ ਕਿੰਨੇ ਕੁ ਲੋਕ ਓਲੰਪਿਕ ਤਗ਼ਮੇ ਜਿੱਤਦੇ ਹਨ। ਅੱਜ ਦੀ ਤਰੀਕ ‘ਚ ਮਸਾਂ 40 ਓਲੰਪਿਕ ਤਗ਼ਮਾ ਜੇਤੂ ਹਨ ਜਦਕਿ ਹਜ਼ਾਰਾਂ ਲੋਕ ਸੰਸਦ ਮੈਂਬਰ ਬਣ ਚੁੱਕੇ ਹਨ।’ ਵਿਨੇਸ਼ ਫੋਗਾਟ ਨੇ ਬ੍ਰਿਜ ਭੂਸ਼ਣ ਵੱਲੋਂ ਪਹਿਲਵਾਨਾਂ ਦੇ ਸਿਆਸਤ ‘ਚ ਸ਼ਾਮਲ ਹੋਣ ਦੇ ਲਾਏ ਗਏ ਦੋਸ਼ਾਂ ਨੂੰ ਆਧਾਰਹੀਣ ਕਰਾਰ ਦਿੱਤਾ। ਉਨ੍ਹਾਂ ਕਿਹਾ, ‘ਅਸੀਂ ਕਿਸੇ ਸਿਆਸਤ ‘ਚ ਸ਼ਾਮਲ ਨਹੀਂ ਹਾਂ। ਅਸੀਂ ਸਿੱਧੇ ਦਿਲ ਤੋਂ ਬੋਲਦੇ ਹਾਂ ਜਿਸ ਕਾਰਨ ਇਥੇ ਕਈ ਲੋਕ ਸਾਡੀ ਹਮਾਇਤ ‘ਚ ਡਟੇ ਹੋਏ ਹਨ।’ ਵਿਨੇਸ਼ ਨੇ ਕਿਹਾ ਕਿ ਬ੍ਰਿਜ ਭੂਸ਼ਣ ਦਾ ਹੰਕਾਰ ਰਾਵਣ ਨਾਲੋਂ ਵੀ ਵੱਡਾ ਹੈ। ‘ਜੇਕਰ ਉਹ ਸੁਪਰੀਮ ਕੋਰਟ ਦੇ ਹੁਕਮਾਂ ਮਗਰੋਂ ਬਰੀ ਹੋ ਜਾਂਦਾ ਹੈ ਤਾਂ ਤੁਸੀਂ ਉਸ ਨੂੰ ਹਾਰ ਪਾ ਸਕਦੇ ਹੋ ਪਰ ਉਸ ਨੂੰ ਅਜੇ ਵੀ ਹਾਰ ਪਾਏ ਜਾ ਰਹੇ ਹਨ। ਉਸ ਨੇ ਕੀ ਕੀਤਾ ਹੈ? ਅਸੀਂ ਜਦੋਂ ਤਗ਼ਮੇ ਜਿੱਤਦੇ ਹਾਂ ਤਾਂ ਸਾਨੂੰ ਹਾਰ ਪਾਏ ਜਾਂਦੇ ਹਨ। ਉਸ ਨੇ ਮਹਿਲਾ ਅਥਲੀਟਾਂ ਦਾ ਸ਼ੋਸ਼ਣ ਕੀਤਾ ਹੈ ਅਤੇ ਉਸ ਦਾ ਸਨਮਾਨ ਕੀਤਾ ਜਾ ਰਿਹਾ ਹੈ। ਮੈਂ ਅਪੀਲ ਕਰਦੀ ਹਾਂ ਕਿ ਉਸ ਨੂੰ ਕੋਈ ਮੰਚ ਪ੍ਰਦਾਨ ਨਾ ਕੀਤਾ ਜਾਵੇ।’ ਬਜਰੰਗ ਨੇ ਕਿਹਾ ਕਿ ਜੇਕਰ ਕਿਸੇ ਨੇ ਕੁਸ਼ਤੀ ਫੈਡਰੇਸ਼ਨ ‘ਚ ਅਹੁਦਾ ਲੈਣਾ ਹੈ ਤਾਂ ਪਹਿਲਾਂ ਤੁਹਾਨੂੰ ਪ੍ਰਦੇਸ਼ ਐਸੋਸੀਏਸ਼ਨ ਦਾ ਮੈਂਬਰ ਬਣਨਾ ਪਵੇਗਾ। ‘ਅਸੀਂ ਕੁਸ਼ਤੀ ਫੈਡਰੇਸ਼ਨ ਦਾ ਕੰਟਰੋਲ ਨਹੀਂ ਚਾਹੁੰਦੇ ਹਾਂ। ਉਸ ਦਾ ਪੁੱਤਰ ਯੂ.ਪੀ. ਐਸੋਸੀਏਸ਼ਨ ਦਾ ਪ੍ਰਧਾਨ ਹੈ ਅਤੇ ਅੱਗੇ ਪੁੱਤਰ ਦਾ ਰਿਸ਼ਤੇਦਾਰ ਸਕੱਤਰ ਹੈ। ਉਸ ਦਾ ਇਕ ਹੋਰ ਰਿਸ਼ਤੇਦਾਰ ਪ੍ਰਦੇਸ਼ ਐਸੋਸੀਏਸ਼ਨ ਦਾ ਵੀ ਮੈਂਬਰ ਹੈ। ਉਹ ਸਾਡੇ ‘ਤੇ ਪਰਿਵਾਰਵਾਦ ਦੇ ਦੋਸ਼ ਲਾ ਰਿਹਾ ਹੈ ਜਦਕਿ ਉਸ ਨੇ ਖੁਦ ਪਰਿਵਾਰਵਾਦ ਫੈਲਾਇਆ ਹੋਇਆ ਹੈ।’
