ਹੜ੍ਹ ਨੇ ਕਾਂਗੋ ‘ਚ ਭਾਰੀ ਤਬਾਹੀ ਮਚਾਈ ਹੈ ਅਤੇ ਪੂਰਬੀ ਕਾਂਗੋ ‘ਚ ਹੜ੍ਹ ਕਾਰਨ ਮਰਨ ਵਾਲਿਆਂ ਦੀ ਗਿਣਤੀ 203 ਤੋਂ ਵੱਧ ਹੋ ਗਈ ਹੈ। ਇਸ ਤੋਂ ਇਲਾਵਾ ਕਈ ਲੋਕ ਅਜੇ ਵੀ ਲਾਪਤਾ ਹਨ। ਦੱਖਣੀ ਕਿਵੂ ਦੇ ਸਥਾਨਕ ਅਧਿਕਾਰੀਆਂ ਨੇ ਇਹ ਜਾਣਕਾਰੀ ਦਿੱਤੀ। ਹੜ੍ਹ ਨਾਲ ਸਭ ਤੋਂ ਜ਼ਿਆਦਾ ਪ੍ਰਭਾਵਿਤ ਕਾਲੇਹੇ ਦੇ ਪ੍ਰਸ਼ਾਸਕ ਥਾਮਸ ਬੇਕੇਂਗ ਨੇ ਦੱਸਿਆ ਕਿ ਹੁਣ ਤੱਕ 203 ਲਾਸ਼ਾਂ ਮਿਲੀਆਂ ਹਨ ਅਤੇ ਬਾਕੀਆਂ ਦਾ ਪਤਾ ਲਗਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਯਮੁਕੁਬੀ ਪਿੰਡ ‘ਚ ਸੈਂਕੜੇ ਘਰ ਹੜ੍ਹ ਦੇ ਪਾਣੀ ‘ਚ ਵਹਿ ਗਏ ਕਿਉਂਕਿ ਬਚਾਅ ਕਰਮਚਾਰੀ ਅਤੇ ਹੋਰ ਲੋਕ ਸ਼ਨੀਵਾਰ ਨੂੰ ਲਾਸ਼ਾਂ ਦੀ ਭਾਲ ਲਈ ਮਲਬੇ ਵਿੱਚੋਂ ਦੀ ਖੋਦਾਈ ਕਰ ਰਹੇ ਸਨ। ਹੜ੍ਹ ਪ੍ਰਭਾਵਿਤ ਐਨੋਰੀਟ ਜਿਕੁਜੁਵਾ ਨੇ ਕਿਹਾ ਕਿ ਉਸਨੇ ਆਪਣੇ ਸਹੁਰੇ ਸਮੇਤ ਆਪਣਾ ਪੂਰਾ ਪਰਿਵਾਰ ਗੁਆ ਦਿੱਤਾ ਹੈ। ਉਨ੍ਹਾਂ ਦੇ ਕਈ ਗੁਆਂਢੀ ਵੀ ਮਾਰੇ ਗਏ ਹਨ। ਉਸ ਨੇ ਕਿਹਾ ਕਿ ‘ਪੂਰਾ ਪਿੰਡ ਬੰਜਰ ਜ਼ਮੀਨ ‘ਚ ਬਦਲ ਗਿਆ ਹੈ। ਹਰ ਪਾਸੇ ਸਿਰਫ ਪੱਥਰ ਹੀ ਹਨ ਅਤੇ ਅਸੀਂ ਇਹ ਵੀ ਨਹੀਂ ਦੱਸ ਸਕਦੇ ਕਿ ਸਾਡੀ ਜ਼ਮੀਨ ਕਿੱਥੇ ਸੀ। ਮਲਬੇ ‘ਚ ਦੱਬੀਆਂ ਲਾਸ਼ਾਂ ਦੀ ਤਲਾਸ਼ ‘ਚ ਜੁਟੇ ਇਕ ਬਚਾਅ ਕਰਮੀ ਮਿਚਾਕੇ ਤਾਮਾਨਾਨ ਕਿਹਾਕਿ ਪਿੰਡ ਦੇ ਲੋਕ ਲਾਸ਼ਾਂ ਦੀ ਸ਼ਨਾਖਤ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ ਅਤੇ ਆਪਣੇ ਪਿਆਰਿਆਂ ਦੀ ਲਾਸ਼ ਮਿਲਣ ‘ਤੇ ਉਹ ਉਸਨੂੰ ਆਪਣੇ ਨਾਲ ਲੈ ਜਾ ਰਹੇ ਹਨ। ਦੱਖਣੀ ਕਿਵੂ ਦੇ ਗਵਰਨਰ ਥੋ ਨਗਵਾਬਿਡਜ਼ੇ ਨੇ ਹੜ੍ਹ ਕਾਰਨ ਹੋਏ ਨੁਕਸਾਨ ਦਾ ਜਾਇਜ਼ਾ ਲੈਣ ਲਈ ਖੇਤਰ ਦਾ ਦੌਰਾ ਕੀਤਾ। ਉਸਨੇ ਟਵੀਟ ਕੀਤਾ ਕਿ ਸੂਬਾਈ ਸਰਕਾਰ ਨੇ ਪੀੜਤਾਂ ਲਈ ਮੈਡੀਕਲ ਅਤੇ ਭੋਜਨ ਦੀ ਸਪਲਾਈ ਕੀਤੀ ਹੈ। ਮੀਂਹ ਅਤੇ ਹੜ੍ਹਾਂ ਕਾਰਨ ਪ੍ਰਭਾਵਿਤ ਇਲਾਕਿਆਂ ਨੂੰ ਜਾਣ ਵਾਲੀਆਂ ਕਈ ਮੁੱਖ ਸੜਕਾਂ ਬੰਦ ਹੋ ਗਈਆਂ ਹਨ ਜਿਸ ਕਾਰਨ ਰਾਹਤ ਸਮੱਗਰੀ ਪਹੁੰਚਾਉਣ ਵਿੱਚ ਮੁਸ਼ਕਲ ਆਈ ਹੈ। ਰਾਸ਼ਟਰਪਤੀ ਫੇਲਿਕਸ ਤਿਸੇਕਦੀ ਨੇ ਪੀੜਤਾਂ ਦੀ ਯਾਦ ‘ਚ ਸੋਮਵਾਰ ਨੂੰ ਰਾਸ਼ਟਰੀ ਸੋਗ ਦਾ ਐਲਾਨ ਕੀਤਾ ਅਤੇ ਕੇਂਦਰ ਸਰਕਾਰ ਸੂਬਾਈ ਸਰਕਾਰ ਦੀ ਮਦਦ ਲਈ ਦੱਖਣੀ ਕਿਵੂ ‘ਚ ਇਕ ਆਫ਼ਤ ਪ੍ਰਬੰਧਨ ਟੀਮ ਭੇਜ ਰਹੀ ਹੈ।
