ਟਿਊਨੀਸ਼ੀਆ ‘ਚ ਸਮੁੰਦਰੀ ਫ਼ੌਜ ਦੇ ਇਕ ਮੁਲਾਜ਼ਮ ਨੇ ਜੇਰਬਾ ਆਈਲੈਂਡ ‘ਤੇ ਇਕ ਯਹੂਦੀ ਪੂਜਾ ਘਰ ਅਲ ਘਰਿਬਾ ਸਿਨਾਗੋਗ ਨੇੜੇ ਫਾਇਰਿੰਗ ਕੀਤੀ ਜਿਸ ਨਾਲ ਇਕ ਸਮੁੰਦਰੀ ਫ਼ੌਜ ਦੇ ਮੁਲਾਜ਼ਮ ਸਮੇਤ 4 ਲੋਕਾਂ ਦੀ ਮੌਤ ਹੋ ਗਈ ਅਤੇ 9 ਲੋਕ ਜ਼ਖ਼ਮੀ ਹੋ ਗਏ। ਇਸ ਤੋਂ ਬਾਅਦ ਸੁਰੱਖਿਆ ਮੁਲਾਜ਼ਮਾਂ ਦੀ ਕਾਰਵਾਈ ‘ਚ ਹਮਲਾਵਰ ਵੀ ਮਾਰਿਆ ਗਿਆ। ਟਿਊਨੀਸ਼ੀਆ ਦੇ ਗ੍ਰਹਿ ਮੰਤਰਾਲਾ ਨੇ ਇਹ ਜਾਣਕਾਰੀ ਦਿੱਤੀ। ਅਜੇ ਇਸ ਗੱਲ ਦੀ ਜਾਂਚ ਕੀਤੀ ਜਾ ਰਹੀ ਹੈ ਕਿ ਇਸ ਹਮਲੇ ਦਾ ਮਕਸਦ ਕੀ ਸੀ। ਜੇਰਬਾ ‘ਚ ਵੱਡੀ ਗਿਣਤੀ ‘ਚ ਯਹੂਦੀ ਰਹਿੰਦੇ ਹਨ। ਮੰਤਰਾਲਾ ਨੇ ਦੱਸਿਆ ਕਿ ਹਮਲੇ ‘ਚ ਮਾਰੇ ਗਏ 2 ਆਮ ਨਾਗਰਿਕਾਂ ‘ਚੋਂ ਇਕ ਫਰਾਂਸ ਅਤੇ ਇਕ ਟਿਊਨੀਸ਼ੀਆ ਦਾ ਰਹਿਣ ਵਾਲਾ ਸੀ। 2500 ਸਾਲ ਪੁਰਾਣਾ ਅਲ ਘਰਿਬਾ ਸਿਨਾਗੋਗ ਚਰਚ ਅਫਰੀਕਾ ‘ਚ ਸਭ ਤੋਂ ਪੁਰਾਣਾ ਹੈ। ਟਿਊਨੀਸ਼ੀਆ ਦੇ ਗ੍ਰਹਿ ਮੰਤਰਾਲੇ ਨੇ ਇਕ ਬਿਆਨ ‘ਚ ਕਿਹਾ ਕਿ ਸਿਨਾਗੋਗ ‘ਚ ਜਾਣ ਤੋਂ ਪਹਿਲਾਂ ਦੋਸ਼ੀ ਨੇ ਇਕ ਸਾਥੀ ਦੀ ਹੱਤਿਆ ਕੀਤੀ ਅਤੇ ਉਸ ਦਾ ਅਸਲਾ ਜ਼ਬਤ ਕਰ ਲਿਆ। ਉਸ ਨੇ ਸਿਨਾਗੋਗ ਦੇ ਨੇੜੇ ਤਾਇਨਾਤ ਸੁਰੱਖਿਆ ਯੂਨਿਟਾਂ ‘ਤੇ ਫਾਇਰਿੰਗ ਕੀਤੀ ਜਿਸ ਨਾਲ ਦੋ ਯਾਤਰੀਆਂ ਅਤੇ ਇਕ ਹੋਰ ਸੁਰੱਖਿਆ ਅਧਿਕਾਰੀ ਦੀ ਮੌਤ ਹੋ ਗਈ। ਇਸ ਘਟਨਾ ‘ਚ ਘੱਟੋ-ਘੱਟ 5 ਸੁਰੱਖਿਆ ਅਧਿਕਾਰੀ ਅਤੇ 4 ਹੋਰ ਨਾਗਰਿਕ ਜ਼ਖ਼ਮੀ ਹੋ ਗਏ, ਜਿਨ੍ਹਾਂ ਨੂੰ ਇਲਾਜ ਲਈ ਹਸਪਤਾਲ ਲਿਜਾਇਆ ਗਿਆ।
