ਹਿੱਟ ਐਂਡ ਰਨ ਦੇ ਮਾਮਲੇ ‘ਚ ਆਸਟਰੇਲੀਆ ਦੀ ਇਕ ਅਦਾਲਤ ਨੇ 18 ਸਾਲਾ ਭਾਰਤੀ ਵਿਦਿਆਰਥੀ ਨੂੰ ਜ਼ਮਾਨਤ ਦੇ ਦਿੱਤੀ ਹੈ ਜਿਸ ਨੇ ਸਿਡਨੀ ‘ਚ ਕਥਿਤ ਤੌਰ ‘ਤੇ 3 ਸਕੂਲੀ ਬੱਚਿਆਂ ਨੂੰ ਇਕ ਕਰਾਸਿੰਗ ‘ਤੇ ਟੱਕਰ ਮਾਰ ਦਿੱਤੀ ਸੀ ਅਤੇ ਹਾਦਸੇ ਵਾਲੀ ਥਾਂ ਤੋਂ ਭੱਜ ਗਿਆ ਸੀ। ਮੀਡੀਆ ਰਿਪੋਰਟ ‘ਚ ਦਿੱਤੀ ਗਈ ਜਾਣਕਾਰੀ ਮੁਤਾਬਕ ਇਸ ਸਾਲ ਦੇ ਸ਼ੁਰੂ ‘ਚ ਇੰਡੀਆ ਤੋਂ ਸਿਡਨੀ ਪਹੁੰਚੇ ਵੰਸ਼ ਖੰਨਾ ਨੂੰ ਵੀਰਵਾਰ ਸ਼ਾਮ ਨੂੰ ਲੇਨ ਕੋਵ ‘ਚ ਫੌਕਸ ਸਟ੍ਰੀਟ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ ਸੀ ਅਤੇ ਚੈਟਸਵੁੱਡ ਪੁਲੀਸ ਸਟੇਸ਼ਨ ਲਿਜਾਇਆ ਗਿਆ ਸੀ। ਉਸ ਨੂੰ ਸ਼ੁੱਕਰਵਾਰ ਨੂੰ ਮੈਨਲੀ ਸਥਾਨਕ ਅਦਾਲਤ ਤੋਂ ਇਸ ਸ਼ਰਤ ‘ਤੇ ਜ਼ਮਾਨਤ ਦਿੱਤੀ ਗਈ ਕਿ ਉਹ ਪੁਲੀਸ ਨੂੰ ਰਿਪੋਰਟ ਕਰੇਗਾ, ਕਾਰ ਨਹੀਂ ਚਲਾਏਗਾ ਅਤੇ ਆਪਣਾ ਪਾਸਪੋਰਟ ਸਰੰਡਰ ਕਰੇਗਾ। ਐਮਰਜੈਂਸੀ ਸੇਵਾਵਾਂ ਵੀਰਵਾਰ ਨੂੰ ਉਦੋਂ ਤੁਰੰਤ ਘਟਾਨ ਸਥਾਨ ਪੁੱਜੀਆਂ ਜਦੋਂ 12 ਅਤੇ 13 ਸਾਲ ਦੀ ਉਮਰ ਦੇ 3 ਬੱਚਿਆਂ ਨੂੰ ਇਕ ਕਾਰ ਨੇ ਟੱਕਰ ਮਾਰ ਦਿੱਤੀ ਸੀ ਕਿਉਂਕਿ ਉਹ ਕਥਿਤ ਤੌਰ ‘ਤੇ ਗਰੀਨ ਸਿਗਨਲ ਪਾਰ ਕਰ ਰਹੇ ਸਨ। ਬੱਚਿਆਂ ਦਾ ਨਿਊ ਸਾਊਥ ਵੇਲਜ਼ ਦੇ ਪੈਰਾਮੈਡਿਕਸ ਵੱਲੋਂ ਇਲਾਜ ਕੀਤਾ ਗਿਆ ਅਤੇ ਬਾਅਦ ‘ਚ ਪੈਰ ਅਤੇ ਸਿਰ ‘ਤੇ ਗੰਭੀਰ ਪਰ ਗੈਰ ਜਾਨਲੇਵਾ ਸੱਟਾਂ ਦੇ ਇਲਾਜ ਲਈ ਹਸਪਤਾਲ ਲਿਜਾਇਆ ਗਿਆ। ਪੁਲੀਸ ਨੂੰ ਸੂਚਿਤ ਕੀਤਾ ਗਿਆ ਸੀ ਕਿ ਹਾਦਸੇ ਤੋਂ ਬਾਅਦ ਵੰਸ਼ ਖੰਨਾ ਮੌਕੇ ਤੋਂ ਫਰਾਰ ਹੋ ਗਿਆ ਸੀ। ਉਸ ‘ਤੇ ਗੰਭੀਰ ਸਰੀਰਕ ਨੁਕਸਾਨ ਪਹੁੰਚਾਉਣ ਦੇ ਸਬੰਧ ‘ਚ 7 ਦੋਸ਼ ਲਗਾਏ ਗਏ ਸਨ। ਮਕੈਨੀਕਲ ਅਤੇ ਫੋਰੈਂਸਿਕ ਜਾਂਚ ਲਈ ਉਸਦੀ ਹੌਂਡਾ ਅਕਾਰਡ ਜ਼ਬਤ ਕਰ ਲਈ ਗਈ ਹੈ ਅਤੇ ਪੁਲੀਸ ਨੇ ਉਸ ਨੂੰ ਲਾਇਸੈਂਸ ਮੁਅੱਤਲ ਕਰਨ ਦਾ ਨੋਟਿਸ ਵੀ ਜਾਰੀ ਕੀਤਾ ਹੈ।
