ਅਭਿਸ਼ੇਕ ਵਰਮਾ ਅਤੇ ਜੋਤੀ ਸੁਰੇਖਾ ਵੇਨਾਮ ਦੀ ਭਾਰਤੀ ਕੰਪਾਊਂਡ ਮਿਕਸਡ ਟੀਮ ਨੇ ਵਿਸ਼ਵ ਖੇਡਾਂ ’ਚ ਆਪਣੇ ਮੈਕਸੀਕਨ ਵਿਰੋਧੀਆਂ ਨੂੰ ਇਕ ਅੰਕ ਨਾਲ ਪਛਾਡ਼ ਕੇ ਕਾਂਸੇ ਦਾ ਤਗ਼ਮਾ ਆਪਣੇ ਨਾਂ ਕੀਤਾ। ਭਾਰਤੀ ਤੀਰਅੰਦਾਜ਼ਾਂ ਨੇ ਸ਼ਾਨਦਾਰ ਸ਼ੁਰੂਆਤ ਕਰਦਿਆਂ ਪਹਿਡ਼ੇ ਗੇਡ਼ ’ਚ ਲੀਡ ਲਈ ਪਰ ਆਂਦਰਿਆ ਬੇਕੇਰਾ ਅਤੇ ਮਿਗੁਏਲ ਬੇਕੇਰਾ ਦੀ ਜੋਡ਼ੀ ਨੇ ਦੂਜੇ ਗੇਡ਼ ’ਚ ਸਕੋਰ ਬਰਾਬਰ ਕਰ ਦਿੱਤਾ। ਵਰਮਾ ਅਤੇ ਜੋਤੀ ਨੇ ਤੀਜੇ ਗੇਡ਼ ’ਚ ਮੁਡ਼ ਵਾਪਸੀ ਕੀਤੀ ਅਤੇ ਆਖਰੀ ਗੇਡ਼ ’ਚ ਵੀ ਸ਼ਾਨਦਾਰ ਪ੍ਰਦਰਸ਼ਨ ਜਾਰੀ ਰੱਖਦਿਆਂ ਮੁਕਾਬਲਾ 157-156 ਨਾਲ ਜਿੱਤ ਲਿਆ। ਭਾਰਤੀ ਤੀਰਅੰਦਾਜ਼ੀ ਐਸੋਸੀਏਸ਼ਨ ਦੇ ਬਿਆਨ ਅਨੁਸਾਰ ਵਿਸ਼ਵ ਖੇਡਾਂ ’ਚ ਇੰਡੀਆ ਦਾ ਇਹ ਪਹਿਲਾ ਤਗ਼ਮਾ ਅਤੇ ਵਰਮਾ ਦਾ ਕੌਮੀ ਪੱਧਰ ’ਤੇ 50ਵਾਂ ਤਗ਼ਮਾ ਹੈ। ਉਂਜ ਵਿਅਕਤੀਗਤ ਵਰਗ ’ਚ ਵਰਮਾ ਨੇ ਨਿਰਾਸ਼ ਕੀਤਾ। ਕੁਆਰਟਰ ਫਾਈਨਲ ’ਚ ਦੁਨੀਆਂ ਦੇ ਅੱਵਲ ਦਰਜੇ ਦੇ ਖਿਡਾਰੀ ਵਿਸ਼ਵ ਚੈਂਪੀਅਨ ਮਾਈਕ ਸਕਲੋਏਸਰ ਨੂੰ ਹਰਾਉਣ ਵਾਲਾ ਵਰਮਾ ਸੈਮੀਫਾਈਨਲ ’ਚ ਜਗ੍ਹਾ ਬਣਾਉਣ ’ਚ ਨਾਕਾਮ ਰਿਹਾ। ਉਸ ਨੂੰ ਫਰਾਂਸ ਦੇ ਜੀਨ ਫਿਲਿਪ ਬੌਲਚ ਤੋਂ 141-143 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਇਸ ਮਗਰੋਂ ਕਾਂਸੇ ਦੇ ਤਗ਼ਮੇ ਦੇ ਪਲੇਅਆਫ ਮੈਚ ’ਚ ਉਹ ਆਪਣੇ ਤੋਂ ਹੇਠਲੇ ਦਰਜੇ ਵਾਲੇ ਕੈਨੇਡਾ ਦੇ ਕ੍ਰਿਸਟੋਫਰ ਪਾਰਕਿਨਸ ਤੋਂ 145-148 ਨਾਲ ਹਾਰ ਗਿਆ।
