ਇੰਗਲੈਂਡ ’ਚ ਬੋਰਿਸ ਜੌਹਨਸਨ ਦਾ ਜਾਨਸ਼ੀਨ ਬਣਨ ਦੀ ਦੌਡ਼ ’ਚ ਹੁਣ ਮੈਦਾਨ ’ਚ ਸਿਰਫ਼ ਦੋ ਉਮੀਦਵਾਰ ਬਚੇ ਹਨ। ਭਾਰਤੀ ਮੂਲ ਦੇ ਰਿਸ਼ੀ ਸੂਨਕ ਨੂੰ ਹੁਣ ਆਖਰੀ ਗੇਡ਼ ’ਚ ਵਿਦੇਸ਼ ਮੰਤਰੀ ਲਿਜ ਟਰੱਸ ਦੀ ਚੁਣੌਤੀ ਦਰਪੇਸ਼ ਰਹੇਗੀ। ਸੂਨਕ ਪੰਜਵੇਂ ਗੇਡ਼ ਦੀ ਵੋਟਿੰਗ ’ਚ ਵੀ ਅੱਵਲ ਨੰਬਰ ਰਹੇ। ਸੂਨਕ ਨੂੰ ਟੋਰੀ ਸੰਸਦ ਮੈਂਬਰਾਂ ਦੀਆਂ 137 ਵੋਟਾਂ ਮਿਲੀਆਂ ਜਦੋਂਕਿ ਟਰੱਸ ਨੂੰ 113 ਸੰਸਦ ਮੈਂਬਰਾਂ ਦੀ ਹਮਾਇਤ ਮਿਲੀ। ਵਣਜ ਮੰਤਰੀ ਪੈਨੀ ਮੌਰਡੌਂਟ 105 ਵੋਟਾਂ ਨਾਲ ਤੀਜੇ ਸਥਾਨ ’ਤੇ ਰਹਿ ਕੇ ਡਾਊਨਿੰਗ ਸਟਰੀਟ ਦੀ ਇਸ ਦੌਡ਼ ’ਚੋਂ ਬਾਹਰ ਹੋ ਗਈ।
