ਰੂਸ ਦੀ ਫੌਜ ਨੇ ਕੀਵ ਖੇਤਰ ’ਚ ਮਿਜ਼ਾਈਲ ਹਮਲਾ ਕੀਤਾ ਹੈ। ਇਸ ਦੇ ਨਾਲ ਹੀ ਰੂਸੀ ਫੌਜ ਨੇ ਉੱਤਰੀ ਚੇਰਨੀਹਾਈਵ ਖੇਤਰ ’ਚ ਵੀ ਹਮਲਾ ਕੀਤਾ ਹੈ। ਇਸ ਦਰਮਿਆਨ ਯੂਕਰੇਨ ਦੇ ਅਧਿਕਾਰੀਆਂ ਨੇ ਦੇਸ਼ ਦੇ ਦੱਖਣ ’ਚ ਕਬਜ਼ੇ ਵਾਲੇ ਖੇਰਸਾਨ ਖੇਤਰ ਨੂੰ ਵਾਪਸ ਕਰਨ ਲਈ ਇਕ ਜਵਾਬੀ ਕਾਰਵਾਈ ਦਾ ਐਲਾਨ ਕੀਤਾ। ਜੰਗ ਦੀ ਸ਼ੁਰੂਆਤ ’ਚ ਖੇਰਸਾਨ ਖੇਤਰ ’ਚ ਰੂਸ ਦੀ ਫੌਜ ਨੇ ਕਬਜ਼ਾ ਕਰ ਲਿਆ ਸੀ। ਖੇਤਰੀ ਗਵਰਨਰ ਓਲੇਕਸੀ ਕੁਲੇਬਾ ਨੇ ਕਿਹਾ ਕਿ ਕੀਵ ਦੇ ਬਾਹਰੀ ਇਲਾਕੇ ’ਚ ਸਥਿਤ ਵੈਸ਼ਗੋਰੋਡ ਜ਼ਿਲ੍ਹੇ ਨੂੰ ਸਵੇਰੇ-ਸਵੇਰੇ ਨਿਸ਼ਾਨਾ ਬਣਾਇਆ ਗਿਆ। ਕੁਲੇਬਾ ਨੇ ਯੂਕਰੇਨ ਟੈਲੀਵਿਜ਼ਨ ’ਤੇ ਕਿਹਾ ਕਿ ਰੂਸ ਮਿਜ਼ਾਈਲਾਂ ਦੀ ਮਦਦ ਨਾਲ ਉਸ ਵੱਲ ਕੀਤੇ ਜਾ ਰਹੇ ਟਕਰਾਅ ਦਾ ਬਦਲਾ ਲੈ ਰਹੇ ਹਨ। ਯੂਕਰੇਨ ਪਹਿਲਾਂ ਹੀ ਰੂਸ ਦੀਆਂ ਯੋਜਨਾਵਾਂ ਨੂੰ ਅਸਫਲ ਕਰ ਚੁੱਕਿਆ ਹੈ ਅਤੇ ਉਹ ਆਪਣਾ ਬਚਾਅ ਕਰਨਾ ਜਾਰੀ ਰੱਖੇਗਾ। ਚੇਰਨੀਹਾਈਵ ਖੇਤਰ ਦੇ ਗਵਰਨਰ ਵਯਾਚੇਸਲਾਵ ਚੌਸ ਨੇ ਦੱਸਿਆ ਕਿ ਰੂਸ ਦੀ ਫੌਜ ਨੇ ਬੇਲਾਰੂਸ ਦੇ ਖੇਤਰ ਤੋਂ ਹੋਨਚਾਰਿਵਸਕਾ ਪਿੰਡ ’ਚ ਮਿਜ਼ਾਈਲਾਂ ਵੀ ਦਾਗੀਆਂ। ਚੇਰਨੀਹਾਈਵ ਖੇਤਰ ਨੂੰ ਹਫ਼ਤਿਆਂ ’ਚ ਨਿਸ਼ਾਨਾ ਨਹੀਂ ਬਣਾਇਆ ਗਿਆ ਸੀ। ਯੂਕਰੇਨ ਦੇ ਰਾਸ਼ਟਰਪਤੀ ਦਫ਼ਤਰ ਨੇ ਕਿਹਾ ਕਿ ਪਿਛਲੇ 24 ਘੰਟਿਆਂ ’ਚ ਸ਼ਹਿਰਾਂ ਅਤੇ ਪਿੰਡਾਂ ’ਚ ਰੂਸੀ ਗੋਲਾਬਾਰੀ ’ਚ ਪੂਰਬੀ ਡੋਨੇਸਤਕ ਸੂਬੇ ’ਚ ਘਟੋ-ਘੱਟ ਪੰਜ ਨਾਗਰਿਕਾਂ ਦੀ ਮੌਤ ਹੋ ਗਈ ਅਤੇ 9 ਹੋਰ ਜ਼ਖਮੀ ਹੋ ਗਏ ਹਨ।
