ਨਿਊਜ਼ੀਲੈਂਡ ਵਸਨੀਕ ਆਬਾਦੀ ਪਿਛਲੇ ਸਾਲ ਦੇ ਦੌਰਾਨ ਅਸਥਾਈ ਤੌਰ ‘ਤੇ 12,700 ਜਾਂ 0.2 ਫੀਸਦੀ ਵਧ ਕੇ 30 ਜੂਨ ਨੂੰ 5.12 ਮਿਲੀਅਨ ਤੱਕ ਪਹੁੰਚ ਗਈ, ਜੋ ਕਿ ਜੂਨ 1986 ਤੋਂ ਬਾਅਦ ਸਭ ਤੋਂ ਘੱਟ ਸਾਲਾਨਾ ਵਿਕਾਸ ਦਰ ਹੈ। ਦੇਸ਼ ਦੇ ਅੰਕੜਾ ਵਿਭਾਗ ਨੇ ਮੰਗਲਵਾਰ ਨੂੰ ਇਹ ਜਾਣਕਾਰੀ ਦਿੱਤੀ ਜੋ ਆਬਾਦੀ ਸਬੰਧੀ ਚਿੰਤਾਜਨਕ ਅੰਕੜੇ ਹਨ। ਸਟੈਟਸ ਐਨਜ਼ੈਡ ਦੇ ਹਵਾਲੇ ਨਾਲ ਰਿਪੋਰਟਾਂ ‘ਚ ਕਿਹਾ ਗਿਆ ਹੈ ਕਿ ਨਿਊਜ਼ੀਲੈਂਡ ਦੀ ਆਬਾਦੀ ‘ਚ ਬਦਲਾਅ ਕੁਦਰਤੀ ਵਾਧਾ ਅਤੇ ਸ਼ੁੱਧ ਪਰਵਾਸ ਦਾ ਸੁਮੇਲ ਹੈ। ਆਬਾਦੀ ਦੇ ਅਨੁਮਾਨਾਂ ਦੀ ਕਾਰਜਕਾਰੀ ਪ੍ਰਬੰਧਕ ਰੀਬੇਕਾਹ ਹੈਨਸੀ ਨੇ ਇਕ ਬਿਆਨ ‘ਚ ਕਿਹਾ ਕਿ ਘੱਟ ਕੁਦਰਤੀ ਵਾਧੇ ਦੇ ਨਾਲ ਮਿਲਾ ਕੇ ਸ਼ੁੱਧ ਪਰਵਾਸ ਘਾਟੇ ਦੇ ਨਤੀਜੇ ਵਜੋਂ ਆਬਾਦੀ ਵਿਚ ਵਾਧਾ ਹੇਠਲੇ ਪੱਧਰ ਦਾ ਹੋਇਆ ਹੈ। ਹੇਨੇਸੀ ਨੇ ਕਿਹਾ ਕਿ ਆਬਾਦੀ ਦੀ ਉਮਰ ‘ਚ ਵਾਧੇ ਕਾਰਨ ਜੂਨ 2022 ਨੂੰ ਖਤਮ ਹੋਏ ਸਾਲ ‘ਚ, ਜਨਮਾਂ ਦੀ ਗਿਣਤੀ ਲਗਭਗ 61,000 ਰਹੀ ਜਦੋਂ ਕਿ ਮੌਤਾਂ ਦੀ ਗਿਣਤੀ 10.1 ਪ੍ਰਤੀਸ਼ਤ ਵਧ ਕੇ 36,900 ਹੋ ਗਈ। ਉਨ੍ਹਾਂ ਅੱਗੇ ਕਿਹਾ ਕਿ ਵਿਆਪਕ ਉਮਰ ਸਮੂਹਾਂ ‘ਚ 65 ਸਾਲ ਜਾਂ ਇਸ ਤੋਂ ਵੱਧ ਉਮਰ ਦੀ ਆਬਾਦੀ ਸਭ ਤੋਂ ਤੇਜ਼ੀ ਨਾਲ ਵੱਧ ਰਹੀ ਸੀ, ਜਿਸ ‘ਚ 2.8 ਪ੍ਰਤੀਸ਼ਤ ਦਾ ਸਾਲਾਨਾ ਵਾਧਾ ਹੋਇਆ ਸੀ। ਉਸਨੇ ਕਿਹਾ ਕਿ ਇਸ ਵਾਧੇ ਦਾ ਜ਼ਿਆਦਾਤਰ ਹਿੱਸਾ 1950 ਦੇ ਦਹਾਕੇ ਦੇ ਮੱਧ ‘ਚ ਪੈਦਾ ਹੋਏ ਲੋਕਾਂ ਦੇ ਨਤੀਜੇ ਵਜੋਂ ਸੀ। ਇਸ ਦੇ ਉਲਟ 15 ਤੋਂ 39 ਸਾਲ ਦੀ ਉਮਰ ਦੇ ਲੋਕਾਂ ਦੀ ਗਿਣਤੀ ‘ਚ 0.5 ਪ੍ਰਤੀਸ਼ਤ ਜਾਂ 8,700 ਲੋਕਾਂ ਦੀ ਕਮੀ ਹੈ।
