ਮਹਿਲਾ ਏਸ਼ੀਆ ਕੱਪ 2022 ਦੇ ਮੀਂਹ ਤੋਂ ਪ੍ਰਭਾਵਿਤ ਮੈਚ ‘ਚ ਇੰਡੀਆ ਨੇ ਮਲੇਸ਼ੀਆ ਖ਼ਿਲਾਫ਼ 30 ਦੌੜਾਂ (ਡੀ.ਐੱਲ.ਐੱਸ. ਵਿਧੀ) ਨਾਲ ਜਿੱਤ ਦਰਜ ਕੀਤੀ ਹੈ। ਬੰਗਲਾਦੇਸ਼ ਦੇ ਸਿਲਹਟ ਦੇ ਕ੍ਰਿਕਟ ਸਟੇਡੀਅਮ ‘ਚ ਖੇਡੇ ਗਏ ਮੈਚ ‘ਚ ਇੰਡੀਆ ਨੇ ਮਲੇਸ਼ੀਆ ਨੂੰ 182 ਦੌੜਾਂ ਦਾ ਟੀਚਾ ਦਿੱਤਾ ਪਰ ਮੀਂਹ ਕਾਰਨ ਖੇਡ ਮੁੜ ਸ਼ੁਰੂ ਨਹੀਂ ਹੋ ਸਕਿਆ ਅਤੇ ਇੰਡੀਆ ਨੂੰ ਜੇਤੂ ਐਲਾਨ ਦਿੱਤਾ ਗਿਆ। ਸਲਾਮੀ ਬੱਲੇਬਾਜ਼ ਐੱਸ. ਮੇਘਨਾ (69) ਦੇ ਆਪਣੇ ਕਰੀਅਰ ਦੇ ਪਹਿਲੇ ਟੀ-20 ਅੰਤਰਰਾਸ਼ਟਰੀ ਅਰਧ ਸੈਂਕੜੇ ਨਾਲ ਇੰਡੀਆ ਨੇ ਏਸ਼ੀਆ ਕੱਪ ਟੀ-20 ਕ੍ਰਿਕਟ ਟੂਰਨਾਮੈਂਟ ‘ਚ ਮਲੇਸ਼ੀਆ ਖ਼ਿਲਾਫ਼ ਚਾਰ ਵਿਕਟਾਂ ‘ਤੇ 181 ਦੌੜਾਂ ਬਣਾਈਆਂ। ਮੇਘਨਾ ਨੇ 53 ਗੇਂਦਾਂ ‘ਚ ਕਰੀਅਰ ਦੀ ਸਰਵੋਤਮ 69 ਦੌੜਾਂ ਬਣਾਈਆਂ। ਸ਼ੈਫਾਲੀ ਵਰਮਾ ਨੇ ਵੀ 39 ਗੇਂਦਾਂ ‘ਚ 46 ਦੌੜਾਂ ਬਣਾਈਆਂ। ਮਲੇਸ਼ੀਆ ਵੱਲੋਂ 17 ਸਾਲਾ ਨੂਰ ਦਾਨੀਆ ਸੁਹਾਦਾ (9 ਦੌੜਾਂ ਦੇ ਕੇ ਦੋ ਵਿਕਟਾਂ) ਅਤੇ ਕਪਤਾਨ ਵਿਨਿਫ੍ਰੇਡ ਦੁਰਾਈਸਿੰਘਮ (36 ਦੌੜਾਂ ਦੇ ਕੇ ਦੋ ਵਿਕਟਾਂ) ਨੇ ਦੋ-ਦੋ ਵਿਕਟਾਂ ਲਈਆਂ। ਮਲੇਸ਼ੀਆ ਦੀ ਪਾਰੀ ਦੀ ਸ਼ੁਰੂਆਤ ਹੌਲੀ ਰਹੀ। ਟੀਮ ਨੇ ਮੀਂਹ ਤੋਂ ਪਹਿਲਾਂ ਓਪਨਰ ਅਤੇ ਕਪਤਾਨ ਵਿਨਿਫ੍ਰੇਡ ਦੁਰਾਈਸਿੰਘਮ (0) ਅਤੇ ਵਿਕਟਕੀਪਰ ਵਾਨ ਜੂਲੀਆ (ਇਕ) ਦੀਆਂ ਵਿਕਟਾਂ ਗੁਆ ਕੇ 3.1 ਓਵਰਾਂ ‘ਚ ਸਿਰਫ਼ 6 ਦੌੜਾਂ ਬਣਾਈਆਂ। ਮਾਸ ਅਲੀਸਾ ਨੇ 17 ਗੇਂਦਾਂ ‘ਤੇ 14 ਦੌੜਾਂ ਬਣਾ ਕੇ ਟੀਮ ਨੂੰ ਉਮੀਦ ਜਗਾਈ ਪਰ 5.2 ਓਵਰਾਂ ‘ਚ ਸਕੋਰ 16/2 ਹੋਣ ਤੋਂ ਬਾਅਦ ਮੀਂਹ ਸ਼ੁਰੂ ਹੋ ਗਿਆ ਜਿਸ ਤੋਂ ਬਾਅਦ ਕੁਝ ਸਮੇਂ ਦੇ ਇੰਤਜ਼ਾਰ ਤੋਂ ਬਾਅਦ ਡੀ.ਐੱਲ.ਐੱਸ. ਨਿਯਮ ਤਹਿਤ ਇੰਡੀਆ ਨੂੰ ਜੇਤੂ ਐਲਾਨ ਦਿੱਤਾ ਗਿਆ।
