ਇੰਡੀਆ ਦੇ ਸਾਤਵਿਕਸਾਈਰਾਜ ਰੰਕੀਰੈਡੀ ਅਤੇ ਚਿਰਾਗ ਸ਼ੈਟੀ ਦੀ ਜੋੜੀ ਨੇ ਫਰੈਂਚ ਓਪਨ ਸੁਪਰ 750 ਬੈਡਮਿੰਟਨ ਟੂਰਨਾਮੈਂਟ ਦਾ ਪੁਰਸ਼ ਡਬਲਜ਼ ਖਿਤਾਬ ਜਿੱਤ ਲਿਆ ਹੈ। ਭਾਰਤੀ ਜੋੜੀ ਨੇ ਫਾਈਨਲ ‘ਚ ਚੀਨ ਦਟ ਤਾਇਪੇ ਦੀ ਲੂ ਚਿੰਗ ਯਾਓ ਅਤੇ ਯਾਂਗ ਪੋ ਹਾਨ ਦੀ ਜੋੜੀ ਨੂੰ ਸਿੱਧੇ ਗੇਮ ‘ਚ ਹਰਾਇਆ। ਭਾਰਤੀ ਜੋੜੀ 2019 ਐਡੀਸ਼ਨ ‘ਚ ਉਪ ਜੇਤੂ ਰਹੀ ਸੀ। ਦੁਨੀਆ ਦੀ ਅੱਠਵੇਂ ਨੰਬਰ ਦੀ ਇਸ ਜੋੜੀ ਨੇ ਲੂ ਅਤੇ ਯਾਂਗ ਦੀ 25ਵੇਂ ਦਰਜੇ ਦੀ ਜੋੜੀ ਨੂੰ 48 ਮਿੰਟਾਂ ‘ਚ 21-13, 21-19 ਨਾਲ ਹਰਾਇਆ। ਇਸ ਤੋਂ ਪਹਿਲਾਂ ਭਾਰਤੀ ਜੋੜੀ ਇਸ ਸਾਲ ਇੰਡੀਅਨ ਓਪਨ ਸੁਪਰ 500 ਖਿਤਾਬ, ਰਾਸ਼ਟਰਮੰਡਲ ਖੇਡਾਂ ‘ਚ ਸੋਨ ਤਗ਼ਮਾ, ਥੌਮਸ ਕੱਪ ਅਤੇ ਅਗਸਤ ‘ਚ ਵਰਲਡ ਚੈਂਪੀਅਨਸ਼ਿਪ ‘ਚ ਕਾਂਸੀ ਦਾ ਤਗਮਾ ਜਿੱਤ ਚੁੱਕੀ ਹੈ। ਇਸ ਜੋੜੀ ਦਾ ਵਰਲਡ ਟੂਰ ‘ਤੇ ਇਹ ਤੀਜਾ ਖਿਤਾਬ ਹੈ। ਇਸ ਦੌਰਾਨ ਭਾਰਤੀ ਬੈਡਮਿੰਟਨ ਐਸੋਸੀਏਸ਼ਨ ਨੇ ਰੰਕੀਰੈਡੀ-ਸ਼ੈਟੀ ਅਤੇ ਜੂਨੀਅਰ ਵਰਲਡ ਚੈਂਪੀਅਨਸ਼ਿਪ ‘ਚ ਚਾਂਦੀ ਦਾ ਤਗ਼ਮਾ ਜਿੱਤਣ ਵਾਲੇ ਸੰਕਰ ਮੁੱਤੂਸੁਆਮੀ ਲਈ ਪੰਜ-ਪੰਜ ਲੱਖ ਰੁਪਏ ਇਨਾਮ ਦੇਣ ਦਾ ਐਲਾਨ ਕੀਤਾ ਹੈ।
