ਡਕਵਰਥ ਲੁਈਸ ਨਿਯਮ ਤਹਿਤ ਟੀ-20 ਵਰਲਡ ‘ਚ ਇੰਡੀਆ ਨੇ ਬੰਗਲਾਦੇਸ਼ ਨੂੰ 5 ਦੌੜਾਂ ਨਾਲ ਹਰਾ ਦਿੱਤਾ ਸੀ ਜਿਸ ਨੂੰ ਲੈ ਕੇ ਪਾਕਿਸਤਾਨ ਲਗਾਤਾਰ ਆਲੋਚਨਾ ਕਰ ਰਿਹਾ ਹੈ। ਹਾਲਾਂਕਿ ਮੈਚ ਤੋਂ ਬਾਅਦ ਬੰਗਲਾਦੇਸ਼ੀ ਹਾਰ ਪਚਾ ਨਹੀਂ ਸਕੇ ਮੈਚ ਦੌਰਾਨ ਪਹਿਲਾਂ ਉਨ੍ਹਾਂ ਨੇ ਅੰਪਾਇਰ ਦੇ ਫੈਸਲੇ ‘ਤੇ ਸਵਾਲ ਚੁੱਕੇ ਅਤੇ ਫਿਰ ਮੈਚ ਤੋਂ ਬਾਅਦ ਉਨ੍ਹਾਂ ਨੇ ਵਿਰਾਟ ਕੋਹਲੀ ‘ਤੇ ਫਰਜ਼ੀ ਫੀਲਡਿੰਗ ਦਾ ਦੋਸ਼ ਲਗਾ ਕੇ ਵਿਵਾਦ ਖੜ੍ਹਾ ਕਰ ਦਿੱਤਾ। ਮੈਚ ਤੋਂ ਬਾਅਦ ਬੰਗਲਾਦੇਸ਼ ਦੀ ਟੀਮ ਹੀ ਨਹੀਂ ਸੀ ਜੋ ਭੜਕੀ ਹੋਈ ਸੀ, ਸਗੋਂ ਪਾਕਿਸਤਾਨ ਦੇ ਇਕ ਸਾਬਕਾ ਖਿਡਾਰੀ ਨੂੰ ਵੀ ਇੰਡੀਆ ਦੀ ਜਿੱਤ ਨਹੀਂ ਪਚੀ। ਪਾਕਿਸਤਾਨ ਦੇ ਸਾਬਕਾ ਕ੍ਰਿਕਟਰ ਸ਼ਾਹਿਦ ਅਫਰੀਦੀ ਨੇ ਹੁਣ ਆਈ.ਸੀ.ਸੀ. ‘ਤੇ ਦੋਸ਼ ਲਗਾਇਆ ਹੈ। ਅਫਰੀਦੀ ਨੇ ਕਿਹਾ, ‘ਸ਼ਾਕਿਬ ਅਲ ਹਸਨ ਨੇ ਵੀ ਇਹੀ ਕਿਹਾ ਅਤੇ ਇਹ ਸਕ੍ਰੀਨ ‘ਤੇ ਵੀ ਦਿਖਾਇਆ ਗਿਆ। ਤੁਸੀਂ ਦੇਖਿਆ ਕਿ ਮੈਦਾਨ ਕਿੰਨਾ ਗਿੱਲਾ ਸੀ, ਪਰ ਮੈਨੂੰ ਲੱਗਦਾ ਹੈ ਕਿ ਆਈ.ਸੀ.ਸੀ. ਦਾ ਝੁਕਾਅ ਇੰਡੀਆ ਵੱਲ ਹੈ, ਇਸ ਲਈ ਉਨ੍ਹਾਂ ਨੇ ਮੈਚ ਦੁਬਾਰਾ ਸ਼ੁਰੂ ਕਰਵਾਇਆ।’ ਉਹ ਇਹ ਯਕੀਨੀ ਬਣਾਉਣਾ ਚਾਹੁੰਦੇ ਹਨ ਕਿ ਇੰਡੀਆ ਕਿਸੇ ਵੀ ਕੀਮਤ ‘ਤੇ ਸੈਮੀਫਾਈਨਲ ‘ਚ ਪਹੁੰਚੇ ਅਤੇ ਅੰਪਾਇਰ ਵੀ ਉਹੀ ਸੀ ਜੋ ਇੰਡੀਆ ਬਨਾਮ ਪਾਕਿਸਤਾਨ ਮੈਚ ‘ਚ ਮੌਜੂਦ ਸੀ। ਦੁਨੀਆ ਜਾਣਦੀ ਹੈ ਕਿ ਉਸ ਨੂੰ ਸਰਵੋਤਮ ਅੰਪਾਇਰ ਦਾ ਪੁਰਸਕਾਰ ਮਿਲੇਗਾ।’ ਦੱਸਣਯੋਗ ਹੈ ਕਿ ਮੈਚ ਦੌਰਾਨ ਕੁਝ ਘਟਨਾਵਾਂ ਨੇ ਵਿਵਾਦ ਪੈਦਾ ਕਰ ਦਿੱਤਾ ਸੀ। ਇੰਡੀਆ ਦੀ ਬੱਲੇਬਾਜ਼ੀ ਦੌਰਾਨ ਸਭ ਤੋਂ ਪਹਿਲਾਂ ਸ਼ਾਕਿਬ ਅਲ ਹਸਨ ਨੇ ਆਪਣੀ ਨਾਰਾਜ਼ਗੀ ਜ਼ਾਹਰ ਕੀਤੀ ਕਿਉਂਕਿ ਅੰਪਾਇਰ ਨੇ ਸਟ੍ਰਾਈਕ ‘ਤੇ ਬੱਲੇਬਾਜ਼ ਦੀ ਅਪੀਲ ਕਰਨ ਤੋਂ ਬਾਅਦ ਗੇਂਦ ਨੂੰ ਨੋ-ਬਾਲ ਕਰਾਰ ਦਿੱਤਾ। ਫਿਰ ਬੰਗਲਾਦੇਸ਼ ਦੇ ਵਿਕਟਕੀਪਰ ‘ਤੇ ਫਰਜ਼ੀ ਫੀਲਡਿੰਗ ਦਾ ਇਲਜ਼ਾਮ ਲਗਾਇਆ ਗਿਆ। ਇਸ ਤੋਂ ਇਲਾਵਾ ਸ਼ਾਕਿਬ ਨੇ ਮੈਚ ਤੋਂ ਬਾਅਦ ਇਹ ਵੀ ਕਿਹਾ ਕਿ ਮੈਦਾਨ ਮੀਂਹ ਤੋਂ ਕਾਫੀ ਗਿੱਲਾ ਸੀ। ਅਫਰੀਦੀ ਨੇ ਇਸ ਵਿਵਾਦ ਤੋਂ ਬਾਅਦ ਆਪਣੀ ਟਿੱਪਣੀ ਦਿੱਤੀ ਹੈ। ਜ਼ਿਕਰਯੋਗ ਹੈ ਕਿ ਮੈਚ ‘ਚ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਇੰਡੀਆ ਨੇ 6 ਵਿਕਟਾਂ ਦੇ ਨੁਕਸਾਨ ‘ਤੇ 184 ਦੌੜਾਂ ਬਣਾਈਆਂ ਸਨ। ਬੰਗਲਾਦੇਸ਼ ਦੀ ਟੀਮ ਦੇ ਟੀਚੇ ਦਾ ਪਿੱਛਾ ਕਰਦੇ ਹੋਏ ਇਕ ਸਮੇਂ ਅਜਿਹਾ ਲੱਗ ਰਿਹਾ ਸੀ ਜਿਵੇਂ ਇੰਡੀਆ ਮੈਚ ਹਾਰ ਗਿਆ ਹੋਵੇ ਕਿਉਂਕਿ 185 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ ਬੰਗਲਾਦੇਸ਼ ਨੇ ਲਿਟਨ ਦਾਸ ਦੇ ਤੂਫਾਨੀ ਅਰਧ ਸੈਂਕੜੇ ਦੀ ਬਦੌਲਤ 7 ਓਵਰਾਂ ‘ਚ ਬਿਨਾਂ ਕੋਈ ਵਿਕਟ ਗੁਆਏ 66 ਦੌੜਾਂ ਬਣਾ ਲਈਆਂ ਸਨ ਪਰ ਇਸ ਤੋਂ ਬਾਅਦ ਮੀਂਹ ਕਾਰਨ ਮੈਚ ਰੋਕ ਦਿੱਤਾ ਗਿਆ ਅਤੇ ਬਾਰਿਸ਼ ਰੁਕਣ ਤੋਂ ਬਾਅਦ ਬੰਗਲਾਦੇਸ਼ ਨੂੰ ਸੋਧੇ ਹੋਏ ਟੀਚੇ ਦੇ ਕਾਰਨ 9 ਓਵਰਾਂ ‘ਚ ਸਿਰਫ 84 ਦੌੜਾਂ ਦੀ ਲੋੜ ਸੀ। ਮੈਚ ਪੂਰੀ ਤਰ੍ਹਾਂ ਬੰਗਲਾਦੇਸ਼ ਦੇ ਹੱਕ ‘ਚ ਰਿਹਾ ਪਰ ਇੰਡੀਆ ਨੇ ਇਸੇ ਸਮੇਂ ਰੁਖ਼ ਪਲਟ ਦਿੱਤਾ ਤੇ ਮੈਚ ਜਿੱਤ ਲਿਆ।
