ਟਾਟਾ ਸੂਮੋ ਡੂੰਘੀ ਖੱਡ ‘ਚ ਡਿੱਗਣ ਕਾਰਨ ਦੋ ਔਰਤਾਂ ਸਮੇਤ 12 ਲੋਕਾਂ ਦੀ ਮੌਤ ਹੋ ਗਈ ਜਦਕਿ ਵਾਹਨ ‘ਚ ਸਵਾਰ ਕੁਝ ਹੋਰ ਵਿਅਕਤੀ ਜ਼ਖਮੀ ਹੋ ਗਏ ਹਨ। ਇਹ ਘਟਨਾ ਉੱਤਰਾਖੰਡ ਦੇ ਚਮੋਲੀ ਜ਼ਿਲ੍ਹੇ ‘ਚ ਵਾਪਰੀ। ਉਥੋਂ ਦੇ ਐੱਸ.ਪੀ. ਪ੍ਰਮੇਂਦਰ ਡੋਵਾਲ ਨੇ ਦੱਸਿਆ ਕਿ 16 ਯਾਤਰੀਆਂ ਨੂੰ ਲੈ ਕੇ ਜਾ ਰਹੀ ਇਕ ਟਾਟਾ ਸੂਮੋ ਸ਼ਾਮ ਕਰੀਬ ਚਾਰ ਵਜੇ ਜ਼ਿਲ੍ਹੇ ਦੇ ਜੋਸ਼ੀਮਠ ਖੇਤਰ ਦੇ ਉਰਗ੍ਰਾਮ ‘ਚ ਖੱਡ ‘ਚ ਡਿੱਗ ਗਈ। ਦੇਹਰਾਦੂਨ ਸਥਿਤ ਸਟੇਟ ਐਮਰਜੈਂਸੀ ਆਪਰੇਸ਼ਨ ਸੈਂਟਰ ਨੇ ਦੱਸਿਆ ਕਿ ਘਟਨਾ ਦੇ ਸਮੇਂ ਯਾਤਰੀ ਜੋਸ਼ੀਮਠ ਤੋਂ ਪੱਲਾ ਜਾਖੋਲ ਪਿੰਡ ਜਾ ਰਹੇ ਸਨ। ਹਾਦਸੇ ਦੇ ਆਖ਼ਰੀ ਸਮੇਂ ਦੋ ਯਾਤਰੀਆਂ ਨੇ ਗੱਡੀ ‘ਚੋਂ ਛਾਲ ਮਾਰ ਦਿੱਤੀ। ਪੁਲੀਸ ਅਤੇ ਸਟੇਟ ਡਿਜ਼ਾਸਟਰ ਰਿਸਪਾਂਸ ਫੋਰਸ ਦੀਆਂ ਟੀਮਾਂ ਮੌਕੇ ‘ਤੇ ਪਹੁੰਚ ਗਈਆਂ ਅਤੇ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤੇ। ਇਕ ਚਸ਼ਮਦੀਦ ਨੇ ਦੱਸਿਆ ਕਿ ਖੱਡ ਲਗਭਗ 300 ਮੀਟਰ ਡੂੰਘੀ ਹੈ ਅਤੇ ਜਿਸ ਥਾਂ ‘ਤੇ ਹਾਦਸਾਗ੍ਰਸਤ ਵਾਹਨ ਪਿਆ ਹੈ, ਉਥੇ ਪਹੁੰਚਣਾ ਮੁਸ਼ਕਲ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਕਾਰ ‘ਚ ਜ਼ਿਆਦਾ ਭੀੜ ਸੀ ਅਤੇ ਕੁੱਝ ਲੋਕ ਛੱਤ ‘ਤੇ ਵੀ ਬੈਠੇ ਸਨ। ਮੁੱਖ ਮੰਤਰੀ ਪੁਸ਼ਕਰ ਸਿੰਘ ਧਾਮੀ ਨੇ ਹਾਦਸੇ ‘ਚ ਲੋਕਾਂ ਦੀ ਮੌਤ ‘ਤੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ ਅਤੇ ਮ੍ਰਿਤਕਾਂ ਦੇ ਪਰਿਵਾਰ ਨੂੰ 2-2 ਲੱਖ ਰੁਪਏ ਦੀ ਐਕਸ-ਗ੍ਰੇਸ਼ੀਆ ਦੇਣ ਦਾ ਐਲਾਨ ਕੀਤਾ ਹੈ। ਉਨ੍ਹਾਂ ਨੇ ਚਮੋਲੀ ਦੇ ਜ਼ਿਲ੍ਹਾ ਮੈਜਿਸਟਰੇਟ ਹਿਮਾਂਸ਼ੂ ਖੁਰਾਣਾ ਨਾਲ ਫ਼ੋਨ ‘ਤੇ ਗੱਲ ਕੀਤੀ ਅਤੇ ਉਨ੍ਹਾਂ ਨੂੰ ਬਚਾਅ ਕਾਰਜ ਤੇਜ਼ ਕਰਨ ਲਈ ਕਿਹਾ। ਧਾਮੀ ਨੇ ਜ਼ਿਲ੍ਹਾ ਮੈਜਿਸਟ੍ਰੇਟ ਨੂੰ ਜ਼ਖ਼ਮੀਆਂ ਦਾ ਮੁਫ਼ਤ ਇਲਾਜ ਯਕੀਨੀ ਬਣਾਉਣ ਲਈ ਵੀ ਕਿਹਾ। ਮਾਰੇ ਗਏ ਵਿਅਕਤੀਆਂ ਦੀ ਪਛਾਣ ਦਲੀਪ ਸਿੰਘ ਚੌਹਾਨ, ਸੀਤਾਬ ਸਿੰਘ ਚੌਹਾਨ, ਸੁਬੋਧ ਸਿੰਘ, ਵਿਕਰਮ ਸਿੰਘ, ਕਸ਼ਮੀਰਾ ਦੇਵੀ, ਲਕਸ਼ਮਣ ਸਿੰਘ, ਤਾਜਵਰ ਸਿੰਘ, ਰਾਜੇਸ਼ਵਰੀ, ਗਜੇਂਦਰ ਸਿੰਘ, ਰਣਜੀਤ ਸਿੰਘ, ਗੱਬਰ ਸਿੰਘ ਅਤੇ ਸ਼ਿਵ ਸਿੰਘ ਵਜੋਂ ਹੋਈ ਹੈ। ਮਾਰੇ ਗਏ ਜ਼ਿਆਦਾਤਰ ਲੋਕ ਕਿਮਾਣਾ, ਕਾਲਕੋਟ, ਡੁਮਕ ਅਤੇ ਪੱਲਾ ਪਿੰਡ ਦੇ ਸਨ।
