ਅਰਜਨਟਾਈਨਾ ਦੇ ਕਪਤਾਨ ਅਤੇ ਅਨੁਭਵੀ ਫੁੱਟਬਾਲਰ ਲਿਓਨਲ ਮੇਸੀ ਨੇ ਐਲਾਨ ਕੀਤਾ ਹੈ ਕਿ ਫੀਫਾ ਵਿਸ਼ਵ ਕੱਪ 2022 ਦਾ ਫਾਈਨਲ ਉਨ੍ਹਾਂ ਦਾ ਆਖ਼ਰੀ ਵਰਲਡ ਕੱਪ ਮੈਚ ਹੋਵੇਗਾ। ਅਰਜਨਟਾਈਨਾ ਨੇ ਲੁਸੈਲ ਸਟੇਡੀਅਮ ‘ਚ ਸੈਮੀਫਾਈਨਲ ‘ਚ ਕ੍ਰੋਏਸ਼ੀਆ ਨੂੰ ਹਰਾ ਕੇ ਛੇਵੀਂ ਵਾਰ ਫਾਈਨਲ ‘ਚ ਜਗ੍ਹਾ ਪੱਕੀ ਕੀਤੀ ਹੈ ਜਿੱਥੇ ਉਸ ਦਾ ਸਾਹਮਣਾ ਫਰਾਂਸ ਨਾਲ ਹੋਵੇਗਾ। ਮੈਚ ਤੋਂ ਬਾਅਦ ਮੀਡੀਆ ਨੂੰ ਸੰਬੋਧਿਤ ਕਰਦੇ ਹੋਏ ਮੇਸੀ ਨੇ ਕਿਹਾ, ‘ਮੈਂ ਇਹ ਉਪਲੱਬਧੀ ਹਾਸਲ ਕਰਕੇ ਬਹੁਤ ਖੁਸ਼ ਹਾਂ। ਫਾਈਨਲ ਖੇਡ ਕੇ ਵਰਲਡ ਕੱਪ ‘ਚ ਆਪਣਾ ਸਫ਼ਰ ਖ਼ਤਮ ਕਰਨਾ ਬਹੁਤ ਖ਼ਾਸ ਹੈ। ਅਗਲਾ (ਵਰਲਡ ਕੱਪ) ਕਈ ਸਾਲਾਂ ਬਾਅਦ ਹੋਵੇਗਾ ਅਤੇ ਮੈਨੂੰ ਨਹੀਂ ਲੱਗਦਾ ਕਿ ਮੈਂ ਉਦੋਂ ਖੇਡ ਸਕਾਂਗਾ। ਮੇਰੇ ਵਰਲਡ ਕੱਪ ਦੇ ਸਫ਼ਰ ਨੂੰ ਖ਼ਤਮ ਕਰਨ ਦਾ ਇਹ ਸਭ ਤੋਂ ਵਧੀਆ ਤਰੀਕਾ ਹੈ।’ ਅਰਜਨਟੀਨਾ ਦੇ 35 ਸਾਲਾ ਕਪਤਾਨ ਆਪਣਾ ਪੰਜਵਾਂ ਵਰਲਡ ਕੱਪ ਖੇਡ ਰਹੇ ਹਨ ਜਦੋਂ ਕਿ ਡਇਏਗੋ ਮਾਰਾਡੋਨਾ ਅਤੇ ਜੇਵੀਅਰ ਮੈਸਕਰਾਨੋ ਨੇ ਸਿਰਫ਼ 4 ਵਾਰ ਚੋਟੀ ਦੇ ਪੜਾਅ ‘ਤੇ ਅਰਜਨਟਾਈਨਾ ਦੀ ਨੁਮਾਇੰਦਗੀ ਕੀਤੀ ਹੈ। ਮੇਸੀ ਕ੍ਰੋਏਸ਼ੀਆ ਵਿਰੁੱਧ 34ਵੇਂ ਮਿੰਟ ‘ਚ ਗੋਲ ਕਰਕੇ ਅਰਜਨਟਾਈਨਾ ਲਈ ਸਭ ਤੋਂ ਵੱਧ ਗੋਲ (11) ਕਰਨ ਵਾਲੇ ਖ਼ਿਡਾਰੀ ਵੀ ਬਣ ਗਏ। ਮੇਸੀ ਨੇ ਕਿਹਾ, ‘ਇਹ ਸਾਰੇ ਰਿਕਾਰਡ ਚੰਗੇ ਹਨ ਪਰ ਮਹੱਤਵਪੂਰਨ ਗੱਲ ਇਹ ਹੈ ਕਿ ਅਸੀਂ ਸਮੂਹ ਦਾ ਉਦੇਸ਼ ਹਾਸਲ ਕਰ ਸਕੇ, ਜੋ ਕਿ ਸਭ ਤੋਂ ਖ਼ੂਬਸੂਰਤ ਚੀਜ਼ ਹੈ। ਅਸੀਂ ਸਖ਼ਤ ਮਿਹਨਤ ਕਰਨ ਤੋਂ ਬਾਅਦ ਜਿੱਤ ਤੋਂ ਸਿਰਫ਼ ਇਕ ਕਦਮ ਦੂਰ ਹਾਂ ਅਤੇ ਅਸੀਂ ਇਸ ਵਾਰ ਅਜਿਹਾ ਕਰਨ ਲਈ ਆਪਣਾ ਸਭ ਕੁਝ ਲਗਾ ਦੇਵਾਂਗੇ।’
