ਭਾਰਤੀ ਮੂਲ ਦੀ ਇਕ ਔਰਤ ‘ਤੇ 2018 ‘ਚ ਫਲੋਰੀਡਾ ‘ਚ ਸਮੁੰਦਰ ਦੇ ਕਿਨਾਰੇ ਇਕ ਇਨਲੇਟ ‘ਚ ਕਥਿਤ ਤੌਰ ‘ਤੇ ਆਪਣੀ ਨਵਜਨਮੀ ਬੱਚੀ ਨੂੰ ਸੁੱਟ ਕੇ ਉਸਦੀ ਮੌਤ ਦਾ ਕਾਰਨ ਬਣਨ ਲਈ ਫਰਸਟ-ਡਿਗਰੀ ਕਤਲ ਦਾ ਦੋਸ਼ ਲਗਾਇਆ ਗਿਆ ਹੈ। ਮੀਡੀਆ ਰਿਪੋਰਟਾਂ ਅਨੁਸਾਰ ਮਾਂ ਨੇ ਇਹ ਕਹਿੰਦੇ ਹੋਏ ਜ਼ੁਰਮ ਕਬੂਲ ਕਰ ਲਿਆ ਕਿ ਉਸਨੂੰ ਨਹੀਂ ਪਤਾ ਸੀ ਕਿ ਉਸ ਨਾਲ ਕੀ ਕਰਨਾ ਹੈ। ‘ਬੇਬੀ ਜੂਨ’ ਦੇ ਨਾਂ ਨਾਲ ਜਾਣੀ ਜਾਂਦੀ ਬੱਚੀ ਦੀ ਮਾਂ ਆਰੀਆ ਸਿੰਘ ਨੂੰ ਜੁਰਮ ਕਬੂਲ ਕਰਨ ਤੋਂ ਬਾਅਦ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਨਿਊਯਾਰਕ ਪੋਸਟ ਅਖ਼ਬਾਰ ਨੇ ਸ਼ੈਰਿਫ ਰਿਕ ਬ੍ਰੈਡਸ਼ੌ ਦੇ ਹਵਾਲੇ ਨਾਲ ਕਿਹਾ, ‘ਬੱਚੀ ਦੀ ਲਾਸ਼ 1 ਜੂਨ 2018 ਨੂੰ ਫਲੋਰੀਡਾ ਦੇ ਬੋਯਨਟਨ ਬੀਚ ਇਨਲੇਟ ‘ਚ ਤੈਰਦੀ ਹੋਈ ਮਿਲੀ ਸੀ।’ ਰਿਪੋਰਟ ‘ਚ ਕਿਹਾ ਗਿਆ ਹੈ ਕਿ ਪਾਮ ਬੀਚ ਕਾਉਂਟੀ ਸ਼ੈਰਿਫ ਦੀ ਕੋਲਡ ਕੇਸ ਯੂਨਿਟ ਦੇ ਜਾਂਚਕਰਤਾਵਾਂ ਨੇ ਜਾਂਚ ‘ਚ ਸਹਿਯੋਗ ਕਰਨ ਵਾਲੇ ਪਿਤਾ ਦਾ ਪਤਾ ਲਗਾਉਣ ਤੋਂ ਬਾਅਦ ਇਹ ਗ੍ਰਿਫ਼ਤਾਰੀ ਕੀਤੀ। ਜਾਂਚਕਰਤਾ ਬ੍ਰਿਟਨੀ ਕ੍ਰਿਸਟੋਫੇਲ ਨੇ ਕਿਹਾ, ‘ਉਹ ਬੱਚੀ ਬਾਰੇ ਕੁਝ ਨਹੀਂ ਜਾਣਦਾ ਸੀ।’ ਨਿਊਜ਼ ਚੈਨਲ ਨੇ ਕ੍ਰਿਸਟੋਫੇਲ ਦੇ ਹਵਾਲੇ ਨਾਲ ਕਿਹਾ, ‘ਉਹ ਜਾਣਦਾ ਸੀ ਕਿ ਉਸ ਸਮੇਂ ਉਸ ਦੀ ਇਕ ਪ੍ਰੇਮਿਕਾ ਸੀ ਜਿਸ ਨੇ ਉਸਨੂੰ ਦੱਸਿਆ ਕਿ ਉਹ ਗਰਭਵਤੀ ਸੀ। ਬੱਚੀ ਦੇ ਪਿਤਾ ਦਾ ਮੰਨਣਾ ਸੀ ਕਿ ਆਰੀਆ ਸਿੰਘ ਦਾ ਗਰਭਪਾਤ ਹੋਇਆ ਸੀ।’ ਕੇਸ ਦੀ ਅਗਵਾਈ ਕਰਨ ਵਾਲੇ ਕ੍ਰਿਸਟੋਫੇਲ ਕਿਹਾ ਕਿ ਆਰੀਆ ਸਿੰਘ ਨੇ ਬੱਚੀ ਨੂੰ ਪਾਣੀ ‘ਚ ਸੁੱਟਣ ਦੀ ਗੱਲ ਕਬੂਲ ਕੀਤੀ ਅਤੇ ਦੱਸਿਆ ਕਿ ਜਦੋਂ ਤੱਕ ਉਸਨੇ ਇਕ ਹੋਟਲ ਦੇ ਕਮਰੇ ਦੇ ਬਾਥਰੂਮ ‘ਚ ਬੱਚੇ ਨੂੰ ਜਨਮ ਨਹੀਂ ਦਿੱਤਾ, ਉਦੋਂ ਤੱਕ ਉਸਨੂੰ ਇਹ ਅਹਿਸਾਸ ਨਹੀਂ ਹੋਇਆ ਸੀ ਕਿ ਉਹ ਗਰਭਵਤੀ ਹੈ। ਕ੍ਰਿਸਟੋਫੇਲ ਨੇ ਆਰੀਆ ਸਿੰਘ ਬਾਰੇ ਕਿਹਾ, ‘ਉਸਨੇ ਕਿਹਾ ਕਿ ਜਦੋਂ ਬੱਚੀ ਦਾ ਜਨਮ ਹੋਇਆ ਸੀ ਤਾਂ ਉਸਨੂੰ ਯਕੀਨ ਨਹੀਂ ਸੀ ਕਿ ਉਹ ਜ਼ਿੰਦਾ ਹੈ ਜਾਂ ਨਹੀਂ।’ ਅਧਿਕਾਰੀਆਂ ਨੇ ਦੱਸਿਆ ਕਿ ਜਦੋਂ ਉਸ ਨੂੰ ਸਮੁੰਦਰ ‘ਚ ਸੁੱਟਿਆ ਗਿਆ ਸੀ ਤਾਂ ਬੱਚੀ ਜ਼ਿੰਦਾ ਸੀ। ਕ੍ਰਿਸਟੋਫੇਲ ਨੇ ਕਿਹਾ ਕਿ ਆਰੀਆ ਸਿੰਘ ਨੂੰ ਇਹ ਨਿਰਧਾਰਤ ਕਰਨ ਤੋਂ ਬਾਅਦ ਹਿਰਾਸਤ ‘ਚ ਲਿਆ ਗਿਆ ਸੀ ਕਿ ਉਹ ‘ਬੌਏਨਟਨ ਬੀਚ ਇਨਲੇਟ ‘ਚ ਬੱਚੀ ਦੀ ਮੌਤ ਲਈ ਪੂਰੀ ਤਰ੍ਹਾਂ ਜ਼ਿੰਮੇਵਾਰ ਸੀ।’ ਪਾਮ ਬੀਚ ਕਾਉਂਟੀ ਦੇ ਸਟੇਟ ਅਟਾਰਨੀ ਡੇਵ ਆਰੋਨਬਰਗ ਨੇ ਕਿਹਾ ਕਿ ਆਰੀਆ ਸਿੰਘ ‘ਤੇ ਫਰਸਟ-ਡਿਗਰੀ ਕਤਲ ਦਾ ਦੋਸ਼ ਲਗਾਇਆ ਗਿਆ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਪਿਤਾ ਤੋਂ ਅਤੇ ਗੁਪਤ ਰੂਪ ‘ਚ ਆਰੀਆ ਸਿੰਘ ਤੋਂ ਇਕੱਠੇ ਕੀਤੇ ਡੀ.ਐੱਨ.ਏ. ਨਮੂਨੇ ਨਾਲ ਜਾਂਚਕਰਤਾਵਾਂ ਨੂੰ ਇਹ ਪੁਸ਼ਟੀ ਕਰਨ ‘ਚ ਮਦਦ ਮਿਲੀ ਕਿ ਉਹ ਉਹ ਮਾਂ ਸੀ। ਆਰੀਆ ਸਿੰਘ ਦੇ ਸੈੱਲਫੋਨ ਰਿਕਾਰਡ ਦੀ ਅੱਗੇ ਦੀ ਜਾਂਚ ਨੇ ਇਹ ਨਿਰਧਾਰਤ ਕਰਨ ‘ਚ ਹੋਰ ਮਦਦ ਕੀਤੀ ਕਿ ਉਹ 30 ਮਈ 2018 ਨੂੰ ਬੱਚੀ ਦੀ ਲਾਸ਼ ਮਿਲਣ ਤੋਂ ਲਗਭਗ 40 ਘੰਟੇ ਪਹਿਲਾਂ, ਬੌਏਨਟਨ ਬੀਚ ਇਨਲੇਟ ‘ਚ ਸੀ। ਆਰੀਆ ਸਿੰਘ ਜੁਲਾਈ 2021 ਤੋਂ ਬੋਕਾ ਰੈਟਨ ‘ਚ ਲਿਨ ਯੂਨੀਵਰਸਿਟੀ ‘ਚ ਸੁਰੱਖਿਆ ਗਾਰਡ ਵਜੋਂ ਕੰਮ ਕਰ ਰਹੀ ਸੀ, ਪਰ ਸਕੂਲ ਦੇ ਬੁਲਾਰੇ ਨੇ ਕਿਹਾ ਕਿ ਉਸਦੀ ਨੌਕਰੀ ਖਤਮ ਕਰ ਦਿੱਤੀ ਗਈ ਹੈ। ਅਦਾਲਤ ਦੀ ਅਗਲੀ ਤਾਰੀਖ਼ 17 ਜਨਵਰੀ ਤੈਅ ਕੀਤੀ ਗਈ ਹੈ। ਆਰੀਆ ਸਿੰਘ ਜੇਕਰ ਦੋਸ਼ੀ ਪਾਈ ਜਾਂਦੀ ਹੈ ਤਾਂ ਉਸ ਨੂੰ ਉਮਰ ਕੈਦ ਜਾਂ ਮੌਤ ਦੀ ਸਜ਼ਾ ਦਾ ਸਾਹਮਣਾ ਕਰਨਾ ਪਵੇਗਾ।
